تاج ... سلطانية ... انتوا وضميركوا

اسمك واسم مدونتك؟

وأنتا مالك يا بارد

احب الالوان؟ الايام؟ الارقام؟

.اللون الفحلئي الكاروهات

يوم التسيع

اخر رقم

برجك وتاريخ ميلادك؟

القاهرة

32/17/3000ونص

اهم مميزاتك؟ واهم عيوبك؟ وماهى الصفه التى تتمنى ان تتوفر فيك؟

المميزات :ما تلاقيش

العيوب:ما تعدش

الصفه اللى بتمنى وجودها

اني اكون زي بتوع الحزن الوطني ماعنديش دم

ماهو مكانك المفضل؟

جونينة الحيوانات زمان

دلوقت بئت زي مصر تحسسك يالضياع

ايه هى هوايتك المفضله؟

ادعي على بتوع الحزن

ما المقوله اللى تؤمن بها؟

لا الة الا اللة

اجمل هديه قدمت لك من مين؟

ولا حد معبرني

اسعد يوم فى حياتك؟ واتعس يوم فى حياتك؟

يوم ما اتولدت اتعس وعكسة طبعا اسعد

الا بالمناسبة اسعد اخبارة اية؟

معاك ثلاث وردات لمين تهديهم ؟

هبيعهم في الاشارة بتاعة ميدان الشهيد العظيم بوبي الحبوب

معاك ثلاث رصاصات .. على من تطلقهم ؟

ممكن تلت تلاف رصاصة؟

طبعا في شلاضيمو سابقا النطع الاعظم حاليا

ماهو رأيك في الحب؟ ولمن تقول اجمل كلمة حب؟

ربنا يجعل كلامنا خفيف علية اللهم احفظنا

روحي انتي طالق

هل من السهل ان تمثل الحب لشخص يحبك لعدم جرح مشاعره؟

والجزمة اعمل فيها اية؟

على دماغ الابعد

المرأة في نظر الرجل ......... أكمل ؟

كيس جوافة ...........

بايظة

الرجل في نظر المرأه.............أكمل؟

اغنية شيكو طهقان زهقان مدايق

ماهو اسعد خبر سمعته هذا العام؟ وماهو اتعس

وفاة النطع الاكبر

طلعت اوشاعة

الرجل في نظر المرأة

حاجة بتنهق

عرفتوها؟

تهدي التاج لمين

الحقيقة احب اهدية شمال

اية فية حاجة؟

انا حر

مصر بأهلها مش بالحرامية

اذا لم تكن لي والزمان شرمبرم فلا خير فيك والزمان ترللي


ما تزعلوش


انا شايف ان دا عقاب

بس مش للشعب

لمن يحكمون

تخيلوا للحظة اننا رحنا كاس العالم وكسبنا تسعة صفر

انا شخصيا

ما كنتش هستحمل اشوف شلاضيمو وهوا فاشخ شلاضيمة

ولا الواد ننوس عين امة

اللي وشة استغفر اللة العظيم علية غضب ربنا

ولا اي حلوف منهم طالع فاشخ بؤة وفرحان

انة جاب الديب من ديلة

كدا كويس

علشان ربنا يرحمني شخصيا من خلئهم

هما كانوا بيقولوا كل واحد في المنتخب هياخد ستة مليون جنية في حالة الصعود

هنفترض ان المنتخب تلاتين فرد

بمية وتمانين مليون

كل شاب محتاج مية ألف علشان وظيفة

وطبعا اما يشتغل هيتجوز بنوتة حلوة كدا

يعني تقريبا كدا

مية وتمانين شاب هيشتغلوا وهيتجوزا مية وتمانين بنت

يعني تلتمية وستين هتتحل مشكلتهم

ولو الشباب صحتهم كويسة ممكن يتجوزا كل واحد اربعة

وتزهزة وتبئا فل اوي

ويا سلام لو اعتبرنا اننا طلعنا للدور التاني في كاس العالم

ودور التمانية

والمربع الذهبي

وخدنا الكاس

لم الفلوس يابا
وشغل الشباب

طب وعهد اللة كدا احسن

بس زي ما انا بقول

هوا كاس العالم كل كام يوم؟

علشان مشاكل الشباب تتحل كلها بسرعة

يعني

مجرد رؤية

اصلي بحلم

بس مش للتأهل لكاس العالم

بحلم بتأهل الجيل الجديد

للجواز

والحياة السعيدة

والغد المشرق

والتفاؤل والامل

وبالمرة

التقدم
والرخاء
والرفاهية

ساعتها

نكون كسبنا

وكسبنا صح


وجبنا بدل الجون

اجيال

مستقرة نفسيا وماديا وعلميا



والنبي يا اخوانا
اي حد يعرف عالمة نص لبة
محتاجة صبي اخوكوا موجود
اصلي عاوز اخش لجنة السياسات

بيئولوا الفلوس هناك بالعبيط
وبوريث العبيط
يعني عبط في عبط

فهيا بنا نستعبط

شوية ملاحيظ

اة هيا ملاحيظ

بس مش ملاحيظ عمومية

الا هوا لسة فية ملا حيظ عمومية؟

بالنوسبة لماشت امبارح

اولا

عاوز واحد كتنلة ابن كتنلة يقول مافيش انتماء عند المصريين بعد كدا
دا شعب رهيب
شايف كل دا وما فيش فايدة
بيحب وبينتمي وبيضحي
من اول التذاكر اللي اتباعت للمحاسيب والشعب اشتراها باضعاف تمنها
لحد اللي شافوة وهما بيدخلوا الاستاد
لحد التشجيع الجنوني والمحترم لناس كلها هابشة على الاقل ستة مليون لكل نفر
والشعب زي ما انتوا راسيين


ثانيا

شعوري الشخصي

علشان عيون بتوع السياسات
وننوس عين امين امة

كنت شايف ان الهزيمة تنصرف في حقهم وبصراحة كدا كنت عاوزهم ينهزموا (قصدي المذكورين)مش حد تاني علشان اكون واضح

بس اما شفت الشعب اللي بحترمة واجلة واوقرة رغم ما يحدث

قلت معلش

نكسب علشان الشعب
وولاد ال...........

ربنا يذلهم من حتة تانية


ثالثا

لو الشعب بنفس اجماع الأمس

أجتمع على اي حاجة

اي حاجة
واخدين بالكوا

بذمتكوا كان دة بئا حالنا

رابعا واخيرا

اهنئ الشعب المصري الشكيك وربنا يسعدكوا كمان وكمان

وزي ما فرحكوا يوم السبت

يفرحكوا الاربعاء

ومن عندي وفوق البيعة

الجمعة و الاحد والاتنين والتلات والخميس

خصوصا الخميس

لانة يمثل في الموروث الشعبي قيمة تاريخية

عيب ياض منك لية

اما تخشوا دنيا هتبئوا تعرفوا

وابئوا تفوا على وش شلاضيموا لو دخلتوها

الجحش ابو بردعة والوحش الغبي

يحكى أنة في سالف العصر والاوان

كان هناك حيوان يتسم بالقبح الشديد والقذارة الاشد وكان هذا الحيوان يسيطر على مقدرات الغابة رغم انة ليس الاذكى ولا الاقوى كل ما كان بتمتع بة من صفات كانت سيئة و لا تخرج عن كونها فساد وافساد

هذا الوحش القبيح وبعد زهاء ثلاثة عقود من السيطرة على المقدرات وبعد ان قام بعمل حفل كبير يتسم بالبهرجة الشديدة والبذخ الاشد ورعاياة يعانون اشد المعاناة من الفقر والابئة والبطالة
وتميز هذا الحفل بأن الوحش قد أزال اخر ما كان يختفي وراءة من اقنعة وأظهر وجهه الحقيقي القبيح والقبيح جدا
ولم يكتفي بهذا بل اجبر الجميع على ان يتغزل في هذا القبح بما ليس فية
ولم يرضى بل استاء لانهم لم يوفوة حقة من المديح!!!!

فجأة

وعلى غير المتوقع

ظهر لهذا الوحش القبيح الغبي الذي لا عهد لة ولا وعد ولا ذمة ولا دين ولا شرف

حمار حصاوي انما اية متشيك اخر شياكة
ولابس حتة دين نتفة بردعة من تصميم أرماني (دا واحد بتاع برادع انما مشهور اوي)

الرعية

ورغم علمهم انة حمار حصاوي ونكاءة في الوحش القبيح بداو في ابداء الاعجاب الشديد بالحمار وبردعتة

وسألوا الحمار

اي برادعي ابدع بردعتك

واحداث القصة لازالت مستمرة

لأن الوحش الغبي
اسقط في يدة
كما اسقط في يد البرادعي اللى لقى زباين مش عامل حسابهم

انا عن نفسي
عاوز بردعتين واحدة صيفي بس تكون كت

وواحدة للشتا وتكون كت برضة

غلاسة كدا

اصلي زهئت اوي من الوحش القبيح
ولا يوجد اي مانع اني ادي فرصة كاملة للبرادعي

ولا انتو رايكوا اية؟

تراهنوني؟

واحد عجوز كل يوم يروح البنك ويودع 5000 جنيه فى حسابه

الموظفين استغربوا

وفى يوم قال لهم المدير لما ييجى نادوه أكيد هو غنى ولازم نستفيد منه

لما جه الراجل ودخل البنك دخَّـلوه الموظفين على المدير

قالّه المدير: أنت بتشتغل إيه؟..قال: عاطل مابشتغلش

قاله المدير: منين كل الفلوس دى؟

قال : أنا بأراهن الناس بـ 5000 جنيه ودائما باكسب

قاله المدير: مش ممكن ... إحكى الحقيقة ...

قال الراجل: خلاص تراهن بـ 5000 جنيه إنى اقدر أبوس عينى

قال المدير: أراهن...



قام الراجل وفك عينه وباسها ورجعها
(عينه زجاج تركيب)

قال الراجل تراهن بـ 5000 جنيه إنى اقدر أعض ودنى

المدير بعد ما فكر واتأكد إن مافيش ودن تركيب قاله: أتحدى

الراجل فك طقم اسنانه وعض به ودنه ورجعه

المدير إداله 10000 جنيه ومشى الراجل



وتانى يوم الصبح لما دخل الراجل البنك نادوه الموظفين ودخلوه على المدير

قاله المدير يا ابن الحلال عشان خاطرى رجعلّى فلوسى

قال الراجل: خلاص أنا حاراهنك على حاجة
إذا إنت كسبت حاديلك ال10000 وإذا أنا كسبت تدينى 5000 جنيه

قال المدير على إيه تراهن

قاله الراجل: تراهنى أن لون غيارك الداخلى السفلى أزرق

قال المدير وهوفرحان: لا طبعا مش أزرق
(متأكد بقى)


قال الراجل: لا أزرق

قال المدير: لا مش أزرق

قال الراجل: خلاص اقلع البنطلون ونشوف

قلع المدير البنطلون وطلع الغيار لونه مش أزرق

وفعلاً رجّع الراجل فلوس المدير

التفت الراجل للموظفين اللى كانوا بيتابعوا وقالهم

أهو قلّعتلكم المدير البنطلون زي ما راهنتكم

كل واحد يجيب 5000 جنيه حسب الإتفاق

يا عيني يا مصر

قطر بحالة وقفت قدامة جاموسة واختلفت الاراء هل هي جاموسة نتاية ولا دكر

لكن تسببت الجاموسة في كارثة بكل المقاييس

موتى لم ولن يعرف عددهم

حكومة بنت.............اخر ذكاوة

وكذلك الجرحي


مصر يا ولداة مش وقف قدامها جاموسة وبس

لا دة وقف في طريقا عيلة جاموس وغبية كمان

جاموسة نتاية وتلاتة دكورة او هكذا يظهر للعيان

الحقيقة يعلمها اللة

والمحصلة واحدة

زي القطر بالظبط

ضحايا

ويعدوا بالاجيال

تصدقوا اجيال كاملة ضحايا

يا نهار مش فايت

مع الاعتذار للاخوة الاسكندرانية

احية واحية واحية

ومن غير ايوة

عليكي يا مصر

وعلى اجيالك اللى راحت

ولسة هتروح

المهم بئا

ما يحكمش

وان حكم استأنفوا

قبل اي حاجة

اعتذر عن الاختفاء المبرر من وجهة نظري

والغير مبرر من وجهة نظركوا

بس مش هقول اكتر من كدا تقولوا بنكد عليكوا ولا

بئيت كئيب ولا حاجة

بس أحياة الغاليين عندكوا تجيبوا منديل ماركة كويسة علشان البربرة مش وقتها خالص دلوقت

المهم بئا

واحد مدب كدا لة واحد صاحبة عندة قطة بيحبها اوي القطة داستها عربية راح المدب قال لصاحبة خبط لزق كدا القطة ماتت

الراجل صاحب القطة جت لة صدمة جامدة اوي قام الاصحاب المشتركين لاخونا المدب وقالوا لة يا أخي ابئا درج الخبر الوحش

مش خبط لزء كدا

قول لة القطة نزلت تلعب في الشارع القطة اتعورت من خبطة العربية القطة حالتها خطيرة وفي الاخر القطة ماتت يكون استعد

نفسيا

المدب ما كدبش خبر وسمع النصيحة

وبعد فترة عرف ان أم صاحبة اللي وجهه بالنصيحة الغالية ماتت جري علية وقال لة امك نزلت تلعب في الشارع


دة على صعيد الفكاهه

الجد بئا

هوا النظام الحاكم هينزل يلعب في الشارع امتى؟

دة بفرض انة نظام تجاوزا يعني

انا بفكر نعمل يوم مخصوص ليهم علشان يلعبوا في الشارع ويا حبذا اذا كان النهاردة

يا كدا يا اما نتلم كلنا بربطة المعلم كدا وننزل نلعب في الشارع

بيان هام

http://mosh3arfa7aga.blogspot.com/





بيان هام
----------


من القيادة العامة للقوات المسلخة لجمعية المغفور لة -وابئا قابلني -سي السيد للمرجلة والشجعنة والذي منة

انة قد تم الانتصار الساحق الماحق المتنيل بستميت نيلة على ما كان يعرف بجمعية المراة المتوحشة

واللي مش مصدق يروح العنوان عالية

وان الزعيمة السابقة للجمعية المهزومة قد اعلنت عن استسلام الجمعية وعضواتها باستثناء نايبتها التقيلة وجاري


البحث عنها وتصفيتها كاخر جيوب المقاومة

هذا وقد اعلنت الريسة عن انشاء جمعية جديدة تسمى جمعية يا لذيذ يا رايق

كبديل نهائي عن الجمعية الموكوسة -جاية من وكسة على وزن نكسة-

وفية اتنين شهود واحد بتاع عيش عندو فرن بلدي انما نيلة قصدي حلو اوي اسمة رامي عياش

والتاني صبي قهوجي وفشل وبئا مطرب وبعد حادثتة المشهورة ويدعى عدوية

مرشح وزير سكافة في اول تعديل وزاري وان كان مش

بيعرف يكتب اهو يبصم واشطة شغال

يعني اللي بيكتب كان هبب اية يعني

ولا اراكم اللة مكروها في امراة متوحشة لديكم

والعاقبة عندكم في المسرات

ملحوظتين رفيعتين
--------------------

1-القوات مسلخة لانها مشيت مشوار طويل والدنيا حر وشمس وخارجين من رمضان وعيد ومدارس وفلس انما اية

من النوع الممتاز


2- يستركوا ربنا تشوفوا لى مكان اتدارى فية من اللي هيجرالي من الست الريسة والعضوات وبالذات النايبة التقيلة

ويا منجي من المهالك يا رب

استرها معانا داحنا غلابة وكي بورد عالفاضي

والسادة العضوات

خفوا اديكم شوية دنا يتيم الام والاب

وشهيد مدونات وبوستات علي ايديكن يا عالم مفترية

انا كنت رايح اجيب جاز مش عارف مين اللي زئني على بتاع الأزاز

اتهدي يا ولية

http://www.egypty.com/manshet/links_go.asp?id=34


هيا الولية دي مش هتتهد بئا وتبطل بوس

ناقص في الشعب المصري اتنين ما باستهومش

واحد مات

والتاني يحدثكم من وراء الكمبروتر

وبهذة الناسبة

نتشرف بأن نحيط سياستكم علما

وطبعا لا اقصد لجنة السياسات

لاني مش ناوي ابوسهم خالص

ليقولوا عليا وزير سكافة ولا حاجة

واحنا صعايدة يطخوني في البلد

نور الشريف

لزقوا لة تهمة ثقافية لية

علشان اخر تمثيلية قال فيها كلام من اللي بيوجع

هيا بقت كدة خلاص

اللي قبلنا قالوا
كل يرى الناس بعيني طبعة

ولا اية

اية

المهم نرجع بئا للاعلان

كنت هقول عندنا انواع جديدة من البوس موديل 2010 ما نزلتش السوق وبأرخص الاسعار

بس نفسي اتسدت من بتوع السياسات

ربنا يسد نفسهم

كرهونا في نعمة ربنا

وبمناسبة خروج العيال من كاس العالم للشباب

وقريبا الكبار

نأمل هذا

علشان نشوف بئا في اجتماع الحزن ونتفرج هيطلعوا بلاويهم تحت اي مسمى

ربنا يوكسهم البعدا

الا هما بعدا ولا قريبين

الاشجار تموت واقفة ..................أحيانا

من الاوقات القليلة في حياتي اللي حاسس فيها ان طوفان الحزن واليأس والألم هزمني .............أو كاد

اوقات بعتقد اني انا والثلاثي المأندل دة بقينا اصحاب وفية بينا وثيقة تعايش

أحيانا سلمي.........زي معاهدة الاستسلام او السلام انتوا وضميركوا

وكتير العكس لازم احارب لا واية انتصر.....اة اصل الاحلام كتير بتكون اجمل من الواقع

اوقات كتير بحاول خرق الوثيقة دي و اوقات بنجح أو اقنع نفسي اني انتصرت
اعتقد هذا........على خلاف الواقع

واوقات تانية اكتر

بيجيني الشعور بان خلاص بئا ما فيش فايدة

يمكن لان الكترة تغلب الشجاعة ....

ولا خلاص بئا الواحد عجز وان الاوان انة يستعد لرحلة الا عودة.....

اصل شباك التذاكر مش بيبيع غير تذاكر في اتجاة واحد رايح بس

لكن

فية امل بعيد اوي

يمكن يتحقق ولابيتهيألي اصلة يروح ويجي يقرب ويبعد تقولش مراجيح المولد

ووقتها الشجرة الميتة تثمر من جديد

يعني

حاجة كدة زي ما تقولوا عشم ابليس في الجنة

حبيت بس انكد عليكوا شوية

لانكوا منكدين عليا بقالكم فترة

فقلت لابد من رد النكد

ويمكن دي مشاعري لحظيا ......... يا عالم

يلا ان شاللة ما حد حوش

بالصلا عالنبي كدة

كل واحد يدب ايدة في جيبة ويتبرع للاطفال دية

ولو جيبك فاضي مع عدم الامؤاخذة

عادي ولا يهمك

دب ايدك في جيب اللي جنبك واتبرع برضة

اصلك هتتبرع يعني هتتبرع

لا يا عم الحاج مش زي الحكومة

الحكومة بتألب بسلامتك وتساعد فقراء اسرائيل

احنا برضة هنألبك بس علشان العيال بعافية شوية

ربنا يشفيهم يا رب العيال طبعا

ويزيح عنك وعنا بتوع العيال

اللي بيساعدو الصهاينة

للة يا محسنين

واحدة ست مسنة

خلفت وربت

وكبرت

وجوزت

وربت الاحفاد

ولادها اما بئت مشلولة وعندها زهايمر

زهقوا منها

ال اية اجوازهن وزوجاتهن مش قادرين يخدموها

رموا الست في دار مسنين في صحرا ء العاشر

الست

حاليا مش عاوزة تعيش لا راضية تاكل ولا تشرب وتقريبا في انتظار رحمة ربنا

تصدقوا ولادها مش فاضيين يروحوا يشوفوها وهيا في رحلتها الاخيرة


اية القسوة دي

اية الجحود دة

أحنا مش بنربي اطفال


احنا بنربي وحوش تنهشنا واحنا بصحتنا واما خلاص نقع يرمونا

احنا بنربي ولادنا غلط

بنعلم ولادنا الانانية

والجحود

وياخدوا وبس

عمرنا ما فكرنا نعلمهم معنى العطاء وزي ما بتاخد لازم وحتما ولابد تدي

الست دي لو كانت بعد ما ترملت اتجوزت وكان معاها شريك حياة دلوقت مش كان وضعها يبئا احسن

لا ازاي دة احنا اللي بنقول

على خلاف شرع اللة

احنا بنشوف ان من فقد زوجتة او فقدت زوجها لأي سبب من الاسباب خلاص بئا

يتعود على الوحدة

ويتذل حتى من اولادة ويشحت منهم كلمة عطف او حنان

وبننسى ان فية بشر لهم احتياجات حياتية عاطفية ونفسية ويمكن جسدية

لكن ولاننا وبمنتهى الصراحة كدابين

بنقول لا ما فيش حاجة من دي

ونقول وفاء واخلاص

كذب وافتراء

احنا يا سادة بمنتهى الصراحة الصادمة


منافقين

وطبعا عارفين مصير المنافق اية شرعا ودينا

يعني اية اتنين مش طايقين بعض ونقول لهم استحملوا علشان العيال

وبعد ما يستحملوا ويشربوا المقلب للاخر

اول من يجحدهم العيال دول اللي ضيعوا عمرهم علشانهم


يعني اية ارمل ولا ارملة


ويلاقي من يؤنس وحدتة ونقول لة لا غلط الصح انك تندفن مع اللي مات


اذا كان ربنا سبحانة برحمتة لسة مدي لة او لها عمر



نيجي بغباوتنا ونقول لا مش وفاء



وكل واحد فينا يروح لبيتة الدافي ونسيبهم في وحدتهم يتحرقوا




اة ما احنا قضاة وخلاص عملنا اللي علينا




حكمنا




بس مع الاسف مش بالعدل



بالنفاق





عمر بن الخطاب قابل واحد عجوز جدا في اواخر ايامة مترهب في الصحرا وعيشتة منيلة بستين نيلة ولا بياكل اكل





عدل ولا بيشرب شرب عدل ولا عمرة استمتع بأي متعة حياتية سألة عن دينة لقاة كافر



عمر بكا بكاء مرير



واما سالوة بتبكي لية



قال



ما معناة




فية ناس بتبيع الدنيا وتشتري الاخرة وبيكسبوا الاخرة






وناس تانية بتشتري الدنيا وتبيع الاخرة وبيكسبوا دنياهم




الاخ دة بئا باع دنياة واخرتة وما اشتراش اي حاجة






فاهمين والا اجيب الخرزانة واعبطكوا

الثقافة و الصفاقة

الاصل


في اي دولة ان اي مسئول وان علا لابد وان يكون المعيار الاساسي في اختيارة قدرتة على تحقيق امال وطموحات المواطنين
دة طبعا في الدول المحترمة اخذين في الاعتبار انة كلما كان هذا المسؤل فوق مستوى الشبهات كلما زادت فرصة في تولي المسئولية
ولو في اي وقت شابتة شائبة كان ذلك مدعاة للتخلص منة فورا وان كانت مجرد شائعات احاطت بة

اما في الدول التي يحكمها نظام شمولي
فالوضع مختلف تماما
المعيار الاساسي للاختيار ولاء هذا المسؤل للحاكم الديكتاتور
اخذين في الاعتبار انة كلما كثرت عيوب هذا المسؤل
ازدادت قدرة الديكتاتور في السيطرة علية
واملاء رغباتة علية


طبعا مش فاهمين حاجة عالعادة
ولا ما داهية لتكونوا فاهمين
أصلكوا لو فهمتوا في البلد دي وهي من الفئة الثانية هيكون مصيركوا مش حلو خالص
أما لو كلكوا عيوب وبلاوي زرقا
فأهلا بكم في
الصفوة!!!!!!!!!!!!!!
الحاكمة
ومش بعيد تبئوا وزرا
ويمكن - ودة متوقف على مقداربلاويكم الزرقا - تترشحوا في القلل المتحدة
بس ابئوا هاتوا مناديل علشان الرشح

وقيل في ذلك

يا مصر يا بلدي فيكي حاجة محيراني نزرع القمح في سنين (بمية الصرف)

و تطلع الكوسة في ثواني (ودة كان زمان)

حاليا تطع الفضايح والبلاوي والكوارث في ثواني

كلمة اخيرة
اللي أختشوا في المعتقل
واللي ................(كلمة ابيحة اوي) بئوا وزرا واترشحوا لليونسكوا وسقطوا
والعالم المتحضر بيقول لة ولمن جاء بة كلمة واحدة بس بليغة جدا

يا فاشل

يا فاشل

شهر رمضان خلص :

فألى كل من اسأت ألية في يوم ما......

الى كل من أخطأت أو قصرت بحقة أو اذيتة بقصد أو دون قصد...

أقول لكم :







أنتوا لسة شفتوا حاجة الجاي ألعن وايامكم سودة معايا :-)(

بالسين ولا بالثاء

طبعا الكحك مليس او مليث ما عرفتش أصلها على قلوبكم

وكابس على مراوحكم

أنا وللة الحمد نفدت

فقلت أعمل بأصلي واديكو حتة رومنسيكي كدة أياكش تساعد على فك طلاسم الكحك ودة طبعا مستبعد جدا ويرقى الى

درجة الاستحالة

وطبعا ردا على حركاتكم الأرعة كل واحدة حاتة صور كحك والذي منة يوجع البطن شوقا وال اية أتفضلوا

طيب يا حاجة منك ليها مستشكرين منكن خالص

أكلنا وشبعنا

وعايزين عدية..... ماشي اخر البوست حضروا الزكايب علشان تعبوا

لأ ولا الل ييعزمني على بورتو مارينا ويخلع ولا يهمني قدامي الترعة فلة اهي

ولا الست الريسة اللي حتى ما عزمتش بفطيرة من البرج اللي على مدخل البلد

ماشي يا ريسة

بكرة ربنا يوعدنا ونتجوز من المنوفية والبلية تلعب



ولأني مش بعرف ادخل صور عالمدونة

أعتبروا ان فية غلء مليان فلوس وأعتبروها عيدية

تخيلوا ما تعرفوش

طب أتعلموا

عمال أعلمكوا تحبوا وتتخيلوا أياكش يتمر بس أما اشوف اخرتها اية معاكو

طبعا رحتوا لقرايبكم ولقحتوا جتتكم عليهم

هيا اي نعم غتاتة

اة غتاتة

صلة رحم
اة تكون ربع ساعة نص ساعة ساعة

انما غتاتة وفطار وغدا وعشا

غتاتة صح

مش أنا اللي بئول دة قرايبكم اشتكوا لي مر الشكوى

يلا ربنا يكون في عون قرايبكو

العيد فرخة

كل سنة وانتم طيبين بمناسبة العيد

حضرتوا هتعملوا اية في العيد

طيب حضروا

انا عن نفسي

ولاني متفرد وفريد ووحيد

اتلم يلا أهو انتا اللي وحيد القرن

انا اقصد وحيد جدا من نوعي

هقضي العيد

مع ربنا

الناس كلها بتنسى

وتفتكر انها عملت اللي عليها وزيادة في رمضان وجة أوان السرمحة

انا بئا مش بحب اهجر من أحب

بعتبر دة منتهى القسوة

وأنا حونين أوي

تاني

كل سنة وأنتم طيبين

ان عاش للعقول

واحد شيخ مسجد

بيطلع كل يوم جمعة يقول للناس خطبة الجمعة وباينة بيفهم ولا أية

كل خطبة يقول جملة واحدة

يا أيها الناس اتقوا ربكم

ويقيم الصلاة

اتكررت الحكاية دي كتير اوي

الناس اللي بتيجي تصلي في المسجد

أكيد تعرفوهم مش كدة

مسكوا عم الشيخ دة بعد صلاة الجمعة وكل واحد سانن لسانة

اية ياعم الشي انتا مش عارف غير الكلمتين دول ما تقرا كدة وربنا يفتح عليك علشان تقول كلام تاني ينفعنا


عم الشيخ قال لهم


أعملوا بالجملة دي الاول وانا اقول لكم على غيرها

فهمتوا

مش بقول لكم باينة بيفهم

هذة هي واللة اعلم

أزعم ان الليلة هي ليلة القدر

شدوا حيلكوا

اللهم انك عفو تحب العفو فاعفوا عنا

اسمعوا دي لحد ما الرقاصة تيجي+تحديث هام جدا

بما اني شخصية مختلفة شويتين

وبما ان حضراتكوا اليومين دول لا يخرج حالكم عن واحد من اتنين يا مشمرين اكمامكوا وجايبين الأفف علشان تعبوا من خير ليلة القدر (ليا الربع)بلطجة كدة

أو قاعدين على باب السيدة علشان تكملوا رمضان وتجيبوا لبس العيد وتدفعوا المدارس(برضة ليا الربع)بلطجة اكتر من الاولانية

فأحب اني اشهيصكوا شويتين واسمعكوا الاغنية دي لأني بحب الاسامي اللي فيها حب ابن ستين في سبعين ولا أقصد هنا
فهمي ولا نظمي ولا رسمي

ايون اخص بالذكر(بكسر الألف) حسني

لا لا ما تفهمنويش غلط

أنا قصدي بحسني شخصية أثرت في حياتي جدا

هوا اي نعم ما اثرش تسعة وعشرين سنة ولا حاجة

هيا كلها مدة الدراسة في الجامعة

اة الواد حسني المنادي اللي كان بيركن لي العربية قدام جامعة القاهرة

شفتي انتوا ظالمني ازاي

وبتعملوا اسقاط لا يد لي فية

اللة يخرب بيت الست الوالدة يا حسني

اصل كنت منشن على بنت حلوة على ما الغتت خلاني اركن كانت البت اتشئطت

يلا بئا
المعنى في بطن الكاتب

ومن نافلة القول ايضا شخصية عم صبري بتاع السنكوتشات قدام تجارة في بين السرايات كان بيدي للناس كلها

السندوتشات في أطباق مسطحة الا العبد للة كنت باخد في طبق السرفيس الكبير

اصلي كنت ببتدي بخماشر سنكوتش والنهاية مفتوحة ما تعدوش يعني وبطلوا أر

اما عن المحاضرات فما كنتش بحضر
اصل دي عينة من اللي كانوا بيحاضرولنا

فتحي سرور جنائي

عاطف عبيد اقتصاد

الرزار مالية وتشريع ضريبي

الجمل دستوري

يعني مبتدي الكورس من بدري عنكوا بكام سنة


نشكر كل من تلطف وتعطف وتشطف وسأل عن الرقاصة

ونحيط سيادتكم علما

أنها أحتمال تطلع افراج تلت تربع المدة عالعيد

محبوسة سياسيا

أصل دي الرقاصة اللي كان بيطبل لها

أحمد هز يا وز

ما فرقتش الهاء عن العاء

كلة عند بتوع السياسات بيجيب فلوس

أنا بكرة أحمد عز

ال اية خير اللهم اجعلة خير

بتاع كدة من بتوع الاستطنطاعات عمل استنطاع رأي ولقى ويا لهول ما رأى

أن الواد صبي العالمة ما حدش طايقة ولا لية تأثير

لأ والأكادة ان تأثيرة سلبي

والخير أما يهل يهل بالزوفة قال جهة سيادية(يعني اية سيادية) اللة أعلم

طلبت الاستنطاع دة علشان تدرسة

يا مبشورين

اة انتم المبشورين

طب وعهد اللة مبشورين ومفرومين كمان

بامارة رمضان والعيد والمدارس وبلاش نفتح لبعض

المهم بئا

يا مبشورين اة انا مصر

لو الجهة السيادية لا تعلم بهذة الحقيقة فتلك مصيبة وان كانت تعلم وعاملة فيها هبلة ومسكوها طبلة فالمصيبة أعظم

فية حاجة اسمها كشف هيئة في الكليات العسكرية اللي منها نسبة كبيرة من بتوع الجهات السيادية

انا بس عاوز اسأل سؤال في منتهى البراءة

اعملوا لعز وشركاة كشف هيئة بما يرضي اللة

ولا بلاش ما يرضي اللة اصلكوا ما تعرفهوش

وفقا للقواعد والمعايير المعمول بها

مش بيقولوا كدة برضة

مش بس صبي العالمة

كل العالم ال.......... اللهم اني هصوم

واحد بقالة عشرين سنة رئيس المجلس التشريعي الاوحد في البلد وملزق شعرة مكسوف من الأرعة

وواحد داخل على ربع قرن بتاع ثقافة وهوا بتاع استغفر اللة العظيم برضة اللهم اني هصوم برضة

مش هكمل بئا منتوا عارفين الباقي ومن غير استنطاعات ولا نيلة

يا بتاع الجهه السيادية

كلمة في ودنك وما تفهمنيش غلط أنا صعيدي

كل يقع على شاكلتة

يلا يا عم اديك اتعكيت معاهم

بالهنا والشفا

رمضان(اللي بعدة)

كل سنة وانتم طيبين

النهاردة عشرة رمضان ذكرى نصر اكتوبر

خالص تهنئتي لصاحب هذا الانتصار

خالص تهنئتي للوحيد الذي صنع الانتصار ولم يتاجر او يتفاخر بة أو يزايد علية

خالص تهنئتي لمن أخضع الجميع لرغبتة وأملى انتصارة على الجميع

خالص تهنئتي لمن دفع ثمن النصر الاف من الشهداء



خالص تهنئتي للشعب المصري

رمضان(اللي بعد كدة)

الشباب بتاع الفيس بوك عاملين حملة ضد الواد ننوس عين امة وعايزينة يغور من وشنا ودة حقهم اكتر من ألف وستمية

شاب وشابة مش عايزين يشوفوا خلقة الابعد فيها حاجة دي

يقوم يطلع واحد اسمة خيبة بيشتغل في الحزن

اية مالكم اسمة كدة خيبة

مش خيبة اة صحيح دة اسمة هيبة بس الفعل زي منا قلت خيبة

قام راصص للعيال يا ولداة شوية تهم توديهم لعشماوي عدل

يا عم من حقهم يختاروا

لا طبعا دول بيهدفوا للزعزعة النظام والاستقرار (خيبة اللي بيقول)

بالذمة دة كلام

ومال ننوس عين امة بالنظام والاستقرار

طب أما انتا صاحب منطق وعقل واسباب وجيهه اقنع الشباب

مش تتهمهم انهم بيحبوا بلدهم وبيكرهوا ننوس عين امة اللي مش نافع في اي حاجة

رمضان(4)

النهاردة حر جدا
زيادة عن اللزوم
حضراتكوا طبعا ما شاء اللة نازلين قراءة قران اللة ينور تقبل اللة ان شاء اللة

ممكن سؤال كدة مع عدم الامؤاخذة

فهمتوا حاجة من اللي بتقروة ولا دش كدة عالفاضي

بلاش دي

مين عمل باللي بيقراة

اذا حصل وفهمتوا بلاش الواو ألف
اذا حصل وفهمنا
وعملنا باللي فهمناة
أكيد حاجات كتير هتتغير

معلش نكدت عليكوا

بس ما ينفعش يا اخوانا نقرا وما نستفيدش

شوية استفادة للة

ومش هتندموا هترتاحوا وتريحوا ربنا يريح بالكوا

رمضان (3)

تاني يوم
كان صعب شويتين لكن الحمد للة

زمان في رمضان والواحد لسة صغير كان رمضان بيجي في الصيف زي دلوقت كدة وكان الواحد زي ما انتوا عارفين اخر ملائكية
كنت اصحى العصر كدة والصفافير تشتغل نلم العصابة وعالنادي كل المدربين والموظفين روحوا علشان يفطروا في بيوتهم واحنا بئا نعيث في النادي فسادا ولا رادع لنا
نسلي صيامنا بالعوم في البسين ونديها كورة ولا مانع من شوية شقاوة كدة عالماشي نلعب مين يغرق مين وتتلخص في اننا نصطاد واحد مننا ونتلم علية ونغرقة لحد ما السر الالهي يقرب يطلع او المغرب يأذن وهنا يعتق مننا
وطيران يا باشا عالبيت
ونلبس عالمايوة المبلول هدومنا واحنا بنشر مية وشكلنا يبقا مش ولا بد خالص
واحنا بنجري سامعين تخبيط الاطباق والناس بتاكل واحنا عمالين نجري نخش عالبيت طبعا يتسم بدنا بكلمتين بس ولا بيحوء فينا جبلات بعيد عنكو
ونهجم عالاكل زي المفاجيع
وزي لية مفاجيع فعلا

وبعد الاكل ننزل تاني
وتبدا السهرة

نجيب كيس البمب لا مؤاخذة ونفك البمب واحدة واحدة ونفضيها في ازايز ازازة حبر ماشي ببس شغال واللي معاة فلوس ازازة اكبر واضخم

ونملا الازازة لاخرها ونقفلها كويس ونطلع فوق سطوح اي بيت ونشن يا معلم

راجل معدي ما يضرش

اصحابنا وهما نازلين يشتروا السحور يستاهلوا مش يجوا يلعبوا معانا بدل بهدلة البيوت

بيت البت اللي الواحد معجب بيها( يخرب بيت دة اعجاب) وتحديدا بلكونتها لازم الواحد يبعبر برضة عن اعجابة

ملحوظة رفيعة

معظم البنات اللي اعجبت بيهم ما خلفوش تفتكروا أنا السبب ؟
ما أظنش

بعد كام قنبلة من دول تسمعوا الاهل بيندهوا علينا بالاسم انا بصراحة كنت بطنش العيال اصحابي مؤدبين يروحوا على طول وبعدين اسمعهم وهما بياخدوا العلقة

انا بئا اروح بعد شوية وانا في منتهى البراءة مش انا يا بابا انا مش بلعب مع الولاد الوحشين
يبص لي من تحت لتحت ماشي يا مؤدب خش اتخمد

اقول لة وصلاة الفجر يا والدي لازم اصليها حاضر يبص لي ويقول ربنا يهديك بس اظن انة يقصد يهدني

مش مشكلة


نصلي الفجر في الجامع ويبدا النشاط الكروي ماتش كورة معتبر يصحي الميتين من سريخنا ونطلع برضة مجبرين
ونضطر اسفين ننام رحمة باهالينا
الى حين ما نصحى بس

ونبتدي من تاني

ملايكة على حق مش كدة

رمضان (2)

اول يوم صيام عدا وللة الحمد

هانت خلاص كلها تسعة وعشرين يوم

اخدت لفة في المدونات بتاعة الاصدقاء تقولش يا جدع كربون

رمضان جة يا حلولي

يخرب بيت اللي مش هيحمل ويشيل من خيرة

اللي مش هيقعد يصلي اربعة وعشرين ساعة وربع مقصر واخي علية

اللي مش هيختم القران مرتين في اليوم يا سواد ليلة


بالراحة يا أخوانا


اة نجتهد



اة نزود رصيدنا شوية او شويات




بس ما اخشاة عليكم اننا نتطرف زيادة عن اللزوم وبالتالي بعد رمضان نقصر بجد




مش معنى كلامي انكم تتخاذلوا




معناة تعقلوا




امة محمد أمة وسط واخدين بالكوا وسط



انا عارف اني عامل زي الفرامل لكنها احيانا بتمنع حوادث



و عارف اني ماشي عكس الاتجاة السائد ودي فيها سحب رخص وحبس وكام ألف جنية غرامة



لكن احيانا الانسان يتغر بعملة



ودة ما اخشاة



صوموا وصلوا واقروا قران واذكروا اللة بس بالعقل واللي يوصل فيكم لمرحلة متقدمة يحاول يحافظ عليها طول السنة


مش يكتفي برمضان بس



يطلع فوق أوي وبعدين ينزل زرع بصل



الشطارة تطلع فوق وتفضل فوق ما تنزلش



فاهمين قصدي ولا كالعادة

رمضان ( 1)

كل سنة وأنتم طيبين دة أولا

ثانيا كنت غطسان اة كنت غطسان أعترضوا بئا يومين ساحل كدة عالماشي ولسة راجع حالا


ثالثا بئا
السخص مننا كل ما يقرب منكو يلاقي كنز
اة وعهد اللة كنز

ربنا يبارك فيكو
ويرضا عنكو
ويتقبلكم فيمن عندة



غموض مش كدة

طيب

أحسن

اصلي شايف طشاش وعاوز انام ولو نمت دلوقت هصحى بدري وبكرة صيام ولو صحيت بدري الحرب العالمية اللي بعد

كدة هتئوم

فأية بئا هلوش كدة لحد ما الفجر يأذن



صيام رمضان سبحان اللة بيعدي وبقدر اصوم
في غير رمضان مستحيل اعرف اكمل يوم دنا حتى اخر مرة حاولت في وقفة عرفات أصوم حطمت الرقم القياسي المسجل باسمي للصيام في غير رمضان
صمت للساعة حداشر وتلت اة واللة اي نعم صحيت من النوم حداشر وخمسة بس حاولت

مع اني أول مرة صمت كان عندي اربع سنين

بس اول مرة اكمل الشهر كاملا كان وانا أكبر من كدة بكتير يمكن ضعف اوضعفين السن دة

والسبب الغريبة

اية ما فهمتوش
افهمكوا

مش قبل العيد بكام يوم كدة تقوم من النوم بعيد عنك كدة تلاقي
كحك وبتي فور وبسكوت وحبيبة قلبي الغريبة

انا بئا اقوم من النوم الاقي الغريبة امي اللة يرحمها راصاها بشكل هرمي كدة ولا هرم خوفو والعبد للة ما يدراش بنفسة الا وهو مخلص عالطبق كلة

اية الصيام

أمي كانت تضحك وتقول لي ومالة الغريبة ما تفطرش كمل صيامك
ابويا بئا اوعا يا عم الحاج كان بيستعمل كل انواع الاسلحة المحرمة دوليا مع العبد للة
بس ولا كان بيهمني المهم الغريبة حبيبتي


يلا ايام

لا بئا فية امي ولا ابويا

اما عن الغريبة

فللة الحمد

من بعد ماشلت المرارة ولا بقدر اقرب لها بتكوم على طول


يلا البركة في الكحك

رمضان جاكوا

كل سنة وأنتم طيبين


بمناسبة رمضان


مواعيد العمل في رمضان


من بعد المغرب للفجر


الصبح

هنشد الكوبس


استعنا عالشقا باللة


سؤال كدة مع عدم الامؤاخذة


العيد أمتا؟

الصيادين المصريين

مجموعة من الصيادين المصريين على باب اللة راحو يصطادوا القراصنة الصوماليين خطفوهم تقولش ناقصين يا خويا مش كفاية القراصنة وقطاعين الطرق والكباري اللي جوة البلد هيلاقوها منين المصريين
لهم اللة


المهم بئا

القراصنة فاكرين ان فية في مصر حكومة بتدي وتدافع عن مواطنيها زي بقيت العالم
عيال هبلة

المهم بئا

القراصنة يتحايلوا عالحكومة المصرية هاتوا خمسة مليون ونرجعهم الحكومة تصرف الفلوس وطبعا على سويسرا عد ل والصيادين يا ولداة في الأسر

ايام ورا ايام وأسابيع ورا اسابيع

القراصنة زهقوا خفضوا المبلغ لربع جنية ولا حد معبرهم

المهم

الصيادين المصريين كمان زهقوا وكالعادة المصرية بندي فرصة واتنين وعشرة
مافيش فايدة

لازم التصرف يكون ذاتي

قاموا كلوا القراصنة علقة معتبرة

اللي جري جري والباقي المصريين أسروهم


المصري اما بيقول يا شر اشتر ربنا يكفيكوا الشر

سامع يا ننوس عين امك

أجري ياض أحسن لك

ما حدش هينفعك

منتهى السخرية بئا ولا اسوأ كومديا سوداء

أن الحكومة عاوزة توهم الشعب أنها حررت الرهاين بعملية عسكرية

لية دي كمان ضربة جوية يا حرامي

ولا ماتش كورة كسبوة بتوجية من الرياسة والوزارة ولجنة السياسات

بالذمة

فية ناس بالشكل دة

لأ واية بيحمكوا تمانين مليون

بخصوص معركة الانترنت

أنتصرنا

اقدام

النت بقالة كام سنة شغال وماشي الحال والغلاسة في حدود المسموح بة وبنتسرق عادي ومطنشين

فجأة

وعلى حين هرة

ننوس عين امة وفي قول اخر الفئري ابن الفئري

ال اية

عامل لقاء مع شباب مصر في الانترنت حبكت يعني ما تقابلهم في مايكلز بتاع العجمي ولا نسيت

تعدي

لا ممكن ابدا

فئر امة وأبوة الدكر والنتاية (مساواة)

النت يا خويا

هيحددوة

مش فاهين طبعا منا عارف انكوا متعلمين تعليم مجاني والهطل للركب

أفهمكوا وأمري للة

اللي بيستخدموا النت هيبئوا زي سكان غزة

والحكومة هتعمل عالنت بوابة

اللي عاوز يدفع

عارف كلنا بندفع من الاول لكن كنا بندفع دفع مقنن

كل شهر مبلغ معلوم ومحدد

دلوقت يا بهوات ويا هوانم

هتدفعوا بس على مزاج الحكومة

كل شهر زي ما هما عايزين

شهر مية

شهر خمسمية

شهر ألف
وعيش يا عم الحجز

مش كدة وبس

ولاد ال...........

سموه اية

الاستخدام العادل للأنترنت ّّّّّّّّّّّّّّّّّّّّّّّ!!!!!!!!!!!!!!!!!!!!!!!!!!!!!!!!!!!

عادل

عادل


عادل وسعاد بيلعبوا في الحديقة جة العسكري قفشهم

هههههههههههههههههههههههههههههههههههههههه

ماشي موافق عادل عادل

بس أطالب بالعدل في كل شئ

بدءا من الحق في تولي رئاسة الجمهورية

نزولا برئاسة الوزراء

ثم الوزارات

مرورا بكل المناصب

يا اما كدة يا أما بلاش منة عادل

وهاتولنا سعاد

من الساحل الشمالي أحييكم وأطلع لكم لساني

وصلت الساحل بالعند فيكو مش كدة وبس لاونمت شوية كمان

وبالبحث والتقصي والتحري والغتاتة لقيت كمبيوتر اقرفكوا منة هتروحوا مني فين

هوا مش زي بتاعي اللي شبة البوتاجاز ابو من غير عيون
ال حديث ال ومالة القديم

المهم بئا

ستيتة سلقتني في الحر وبئيت نص سوا (هربت قبل ما تخلص عليا)

قريت عند كام واحد ارائهم في اللقاء

بس ثبت بالديل القاطع والبرهان الساطع ان عندي حق وان فية أمل وأمل كبير ان حال البلد دي ينصلح

بس طبعا كل الحضور وبالذات اللي زوغوا وما دفعوش الحساب زي الفل

ستوتة دي حكاية

أول مرة أشوفها بالعين بس سبحان اللة عرفتها فورا

وكان فية بنات زي الفل والورد مش بعاكس ولا حاجة بس بوصف

وشباب زي .....زي اية الشباب بيتوصفوا بأية؟؟ اصل ماليش سوابق في حكاية الشباب دي

البنات تلاقوني رهوان

الشباب رجالة بجد

مستكنيص انا عالاخر من كل ماسبق

كل واحد وواحدة من من حضروا يمثل قيمة يعتد بها قيمة مهمة جدا الاسامي هتلاقوها تفصيلا عند ستيتة اصل الزهايمر شغال معايا اللة ينور
انا بعرف الناس بالمواقف مش بالأسامي

بس دة مرة تانية عشان شاحت الكمبيوتر وشاحت من شاب لو من بنت كان الوضع أختلف كليا


بس مش هقدر اسكت عن واحدة

صاحبة مدونة روح قلب ماما

مش عارف اقول اية اصل الكلام بيعجز احيانا بس هحاول واكيد اكيد هفشل

روح رائعة رغم صعوبة الاختبار من اللة


مثال يحتذا في الصبر والرضا والهدوء والأدب وكل المعاني الفاضلة


خالص احترامي سيدتي

بمنتهى الغضب

البلد مش بلدي وحاسس بالفساد في كل مكان
-----------------------------------------
جملة قالها طالب لرئيس الوزراء

علشان ما اشتمش واكون في منتهى قلة الادب

هلخص
وليكون شعار المعارضة للفساد في مصر من الان فصاعدا

______________________________

البلد مش بلدي وشايف الفساد في كل مكان
_______________________


رئيس الوزرا
ما ردش على سؤال مهم
بكيت على ضحايا العبارة والجنود المصريين الذين يقتلوا على الحدود مع اسرائيل



ليكن هذا السؤال اجباريا لكل من يريد ان يكون مسؤلا في مصر وعلى ضوء اجابتة

سيتحدد من هو


مصري

ولا
خائن وعميل

يجب اعدامة

رميا بالجزم المتعاصة بجلة من بهايم مريضة بتشكيلة الفوانزا خنازير على حمى قلاعية

على جنون بقر على تيفود لو نسيت حاجة سماح اصل من كترهم بقيت بنسى

سماح النوبة

صديقتي العزيزة ستيتة عاملة بوست عن التسامح والصدق والحزن فوق البيعة
هضربهم مع بعض في الخلاط واطلع لكوا بوست شيك على وزن ميلك شيك
يجمع بينها ان كلها مشاعر انسانية ويفصل بينها في نفس الوقت صادرة عن اي انسان يعني الانسان بجد ولا الحمار المتنكر في صورة انسان

مش شرط انك تكون زي القطر كدة تتصرف زي المكنة اي غلط تروح فارم يا عم الحاج
كل ظرف ولة طريقة في التعامل معاة اما يغلط فيك انسان تحبة وتحترمة وتقدرة ولة عندك رصيد أكيد مقدار تسامحك هيختلف تماما عن لو كان نفس الخطأ صادر عن من تحتقرة ورصيدة عندك زي رصيد معظمنا في البنوك مدين
مش كدة ولا اية
يعني فية اختلاف في رد الفعل لان الانسان بيضع في اعتبارة من صدر منة الفعل اولا وثانيا الفعل في ذاتة

الصدق بئا
انا شايف ان جزء كبير من مشاكلنا اننا مش بنتعامل بصدق ولا حتى مع نفسنا
بنسمي الاشياء بغير مسمياتها بندلعها طب لية ؟اعتقد جبن
الشجاع يقول اية اللي في داخلة بشرط يتحمل النتائج كاملة
او يتكتم
بالبساطة دي
من غير كلكعة ولا عقد
النيلة اللي منيلة بستين نيلة اننا بنكذب لا وبنلاقي تبرير لكدبنا اخلاقيا او دينيا او نفتكس لة اي تبرير والسلام
اصل الصدق في كتير من الاحيان صادم ويجبرك على اتخاذ قرارات مؤلمة وما حدش عايز يتلحلح

الحزن بئا
لو كان رجلا لقتلتة
أو كما قال عبد الوهاب مطاوع رحمة اللة
للة الحكمة ولنا الألم

الأرعة عينها على شعر بنت أختها

أبو طويلة عارفينة الجدع اللي شبة السيمافور اللي هوا كان أساسا خازوق وأيفوة
زعلان أوي جدا خالص
لية بئا
المصريين في الخارج طافحين الكوتة وبيبنوا في بلاد مش بلادهم وبيعمروها وبيعلوها وياريت بيتمر بعد ما ضاقت بيهم بلدهم بفعل عصابة من السماسرة وال......... ولا بلاش اصل فية ناس محترمة بتقرا
لكن مش دي المشكلة
ابو طويلة شايف ان المصريين في الخارج المطرودين من بلدهم بفعل الحرامية وسوء التخطيط وانعدام الادارة والارادة
لا يؤدوا واجبهم !!!!!!!!1 واخدين بالكوا واجبهم نحو مصر!!!!!!!!!!!!!!!!!!!!!
ية يا ابو فصادة قصدي طويلة
بيصرفوا شقاهم وتعبهم في كلام فارغ
ادوني عقلكوا وامشوا حافيين
سؤال عارض وانتا مالك يا بارد يا تلم يا رخم
طفشوا منك وسابوهالك مخضرة والاصح خربتها وقعدت على تلها
مالك ومالهم
راحوا بلاد غريبة بمعرفتهم وبمجهودهم واشتغلوا وعرقوا ودفعوا من عمرهم وغربتهم وحصلوا على أقل القليل
وعينك فية يا تلم
اية الحكاية
خلاص شطبت على اللي جوة اندرت عاللي برة
طب عايزهم يصرفوا مالهم في اية
الرد ما يصرفوش
يدوة لبسلامتة وهوا هيتصرف
صحيح اتق شر كل من أقترب من الارض ومن بعد عنها دة اولا
ثانيا بئا
أذا لم تستح فأفعل ما شئت

حساب

الثورة المصرية بقالها وقت
ومر عليها رؤساء
1-محمد نجيب
2-عبد الناصر
3-السادات
4-خسارة اني اقول اسمة

مات أول تلاتة

ملاحظ ان محمد نجيب اقلهم أخطاء لانة قعد فى الحكم فترة قصيرة جدا
عبد الناصر حكمة جزئين اول عمل فية نهضة صناعية رائعة بنى مصانع وأصلح أحوال الناس وامم القناة وبنى السد وقبل كل دة طرد الانجليز من العاصمة أولا حتى الجلاء التام عن كل مصرفغي الفترة دي كان ملتصق بالشعب يتأثرمنة ويؤثر فية
كان يستشير ويأخذ بمبدأ الشورى الافكار تتداول بيحكم راية اة بس بيعدلة ليخرج في أحسن صورة

الفترة التانية بعد محاولة اغتيالة في ميدان المنشية وهننا كانت الماساة حصل الفصل بين الحاكم والمحكومين وبدا الانهيار اللي أنتهى بالنكسة أو الوكسة سموها زي ما تحبوا لكن الراجل بعد فوات الاوان افاق وحاول الاصلاح لكن وقتة كان خلص


الرئيس السادات جة بعد عبد الناصر وأول حاجة عملها انة طير العصابة اللي كانت مسيطرة عالحكم وبدأ يحاول الاصلاح بمساندة ليست قوية من الشعب لكنها كانت تدفعة دفعا للحرب والثأر والانتصار وقد كان
وبدات المرحلة الثانية الغرور والاعتزاز بالذات والبعد عن الشعب اي نعم كان اقل من ناصر في البعد يمكن لانة عانى وعاش عيشة الفقراء المضطهدين لكن برضة حصل الانفصال بينة وبين الشعب كان ممكن بشوية شورى تنتهي كامب ديفيد بأحسن مما انتهت الية بمراحل
لكن انتهي وقتة ومات


التلاتة اللي فاتوا كانوا رؤساء بحق هدفهم الشعب اولا وأخيرا ومصر نجحوا احيانا وفشلوا اخرى لكن هدفهم في النهاية كان واضح رفعة شأن الوطن
اتغروا شوية يمكن
لكن كانوا بيحبوا مصر وشعبها وماتوا وهما بيبذلوا أقصى ما يستطيعوا لصالح البلد وصلاح الشعب ما عمروش كتير عشر سنين اكثرهم


مش هتكلم عن من بعدهم لان أوان الكلام انتهى

فلة القلة

بيقول لك اية يا عم الحاج
أن في ايام الحكم العثماني اللي جاب الامة الاسلامية ورا وكان سبب رئيسي في الافكار المنيلة اللي شايفينها لحد دلوقت
والتي تعتمد على ان رأي الفرد-أي فرد- هو الصح وما دونة كفرة زناديق مع انة مش حافظ الفاتحة وما يعرفش عدد ركعات كل صلاة وعمال يهرتل قال اللة وقال الرسول وهوا بذات نفسيتة أكبر ضلالي
المهم كان السلطان في الاستانة بيبيع البلاد للولاة مقابل تمن معلوم اقرب ما يكون للمزاد اللي يدفع اكتر يشيل
ويجي الوالي على البلد بتاعتة ما هو شاريها ودافع تمنها وعاوز يرجع اللي دفعة اضعاف مضاعفة
المهم علشان ما أطولش عليكو لتنامو مني
تفضل العملية كدة الاكبر يبيع للاصغر لحد أخر هلفوت من الهلافيت دة بئا يلم من الناس الفلوس بكل الطرق والكباري وطبعا الناس اللي بتشيل الليلة في الاخر الشعب دقيق العيش مسرطن ماشي
خضار بالمبيدات ما يضرش
لحمة بالسم الهاري شغال
طب وبعدين
اخوانا بتوع السلطة لطاف جدا خلاص هبشوا وكوشوا عالدنيا وبئا عندهم مليارات لا تعد ولا تحصى والشعب مش لاقي اللضا مش مشكلة يفكروا بئا في الاخرة يعملوا اية بئا
يبنوا جامع اة وعهد اللة
بس استنوا ما تفهموش غلط
يبنوا الجامع ازاي
بتلائيح الجتت
التاجر فلان نهبش من عندة الطوب والعلان الاسمنت والارض بتاعة ايتام ما يضرش تتهبش برضة
طب مين اللي هيبني
اي حد معدي في الشارع يصطادوة ويشغلوة سخرة في البناء
واما يخلص الجامع
يطمن عالاخر انة ضمن الدنيا بالنهب والاخرة بالسحت
أدي العقلية
اللي فضلت تحكمنا قرابة الثلاث قرون
مش بقول لكوا جابوا الامة ورا

تفتكروا التاريخ بيعيد نفسة
اظن كدة

عودة الشيخ الشريب

النهاردة الجمعة
وطبعا من أهم مظاهر الاحتفال بيوم الجمعة قراءة سورة الكهف
لية بئا
بيقول لك يا عم الحاج
ان قرائتها يوم الجمعة بيغفر ما بين الجمعتين من ذنوب
وفي قول اخر زاد ثلاثة ايام يعني هيبقالك عند ربنا ثلاث ايام زيادة
اية الحلاوة دي
كازيون يا بشر
وبعين الاقي واحد جاي يقول كلنا رايحين النار
يخرب بيت الأبعد
لية يا سي زفت
بئا ربنا سبحانة وتعالى مادد ايدة لينا وأحنا بمنتهى السفاهه بنقول لا معلش ما فيش فايدة
لا بئا فية أن شاء اللة فايدة
لسبب بسيط خالص
عارفينة
اة أن ربنا اللة
فية حديث اما الدنيا تسود في وشي بفتكرة على طول مش هقول بالنص منعا للخطا(أصلي بخاف من ربنا) اة بحبة وبخاف منة
بيقول اية بئا- فتحت صحيح الاحاديث القدسية لقيت كنز - مش عارف ابتدي منين وانتهي فين
لا بصوا روحوا اقروا انتوا بئا وشوفوا رحمة ربنا التي وسعت كل شئ
دة اللي قال أشهد ان لا الة الا اللة واشهد ان محمد رسول اللة مرة واحدة في حياتة (من قلبة) حرم جسدة على النار
طب عاوزين اية تاني
اة عاوزين طبعا
الظلم يا أفندية
أحذروا الظلم
ربنا حرم على نفسة الظلم قبل ما يحرمة علينا
فكروا فيها شوية
مش بعادة أنا عارف بس فكروا
اتشاهدوا وابعدوا عن الظلم
صعبة دي؟
متهيألي مش صعبة على من رضي اللة عنهم
وصعبة أوي على من كانوا غير ذلك
رب أغفر وأرحم فلا يغفر الذنوب الا انت
ربنا سبحانة وتعالى لة مالا يعد ولا يحصى ممن يعبدونة
لكن انا شخصيا ليس لي رب سواة
بكلم ربنا فية حاجة

اخر اية في سورة الكهف
فيها كل المعاني
ما تقروا وتخلوا عندكوا شوية بتاع من الاحمر دة واللي مش بيعرف يقرا لسبب أو اخر مافيش مشكلة يسمع
تقبل اللة منا ومنكم

الذوق ما خرجش من مصر+ تحديث

بمناسبة حكاية ابو تريكة هيمشي ولا قاعد

كان فية قصة زمان من التراث الشعبي
بأختصار شديد
ان فية واحد أسمة حسن الذوق(والذوق هنا مقصود بيها المعنى)كل ما هو حميد من الصفات يلخصها الراوي ولا أتذكرة في لفظة الذوق
المهم عمكوا الذوق دة وهو عايش في مصر
لاقى كل أنواع الظلم والجور والغبن
وعانى من الفقر
واتهم بأبشع الاتهامات كالعادة
من طبقة الاغنياء الحرامية في المجتمع
لا ما كانوش لسة سموا نفسهم الحزن الوطني
ورغم كل دة
البسطاء كانوا بيحبوة ويحترموة ويجلوة
مما أوغر صدر الحزن الوطني وتكتلوا على الذوق ورموة بكل ما يتمتعون بة من نقائص وهي كثيرة ولا يحتملها مخلوق سواهم من فرط قبحها اشمأزازا من تلك الصفات وممن يحملونها

لدرجة أن الراجل قرر انة يسيب مصر ويهج ولة كل الحق رغم حبة الشديد لأهلها البسطاء الذين لا يملكون لة ولا لأتفسهم شيئا الا الدعاء


الموقف كالتالي

الذوق راكب حمارة وعلية ما يملكة وهو قليل وخارج من مصر
والناس كلها ملمومة
ومنقسمين لقسمين

الحزن الوطني شمتان وفرحان وبيعد الثواني علشان يخلص من الراجل الطاهر

والمصريين الغلابة حزانا وبرجوة ما يسيبش مصر متعلقين بية كاخر امل ليهم

الذوق خلاص فاضل كام خطوة ويخرج من مصر

والقسمين كل من موقعة بلغ بة احساسة ذروتة

الحزن الوطني اخر انشكاح وشماتة وحقد

والمصريين الغلابة اخر حزن وألم وأمل

فجأة الذوق يقع من على حمارة

فاقدا الحياة

المصريين الغلابة رغم حزنهم الشديد
عزائهم ان الذوق (المعنى) وان كان قد مات وفاضت روحة وتركتهم فما خرجش من مصر ولو جسد بلا حياة شعب يرضى بأقل القليل فلا يأخذ اي شئ بل يؤخذ منة كل شئ

بس خلاص
مش قلت لكم الذوق مش هيخرج من مصر

واذا خاطبهم الجاهلون قالوا سلاما

أفهم جيدا أن مهنة الكتابة مهنة ليست بالسهلة خاصة أذا اتخذت كحرفة يتكسب منها المرء والتكسب لة وجهان مادي(فلوس يعني) والوجة الاخر وفي نظر الكثيرين أهم بصورة أو بأخرى عن الاول وهو المكسب المعنوي(الشهرة)
وطالما ان ما سبق يجري وفقا لسياق متصل فلا مانع (هنعديها) بمعنى بتاع السبوبة عارفينة وبتاع الصالح عارفينة
لكن الطامة الكبرى عندما يحس الكاتب بأنحسار شهرتة
يبدأ فيما درج على تسميتة (التلويش)
أو بلغة الشباب التخبيط في الحلل
يبدأ في هدم اسس لا يجوز بأي حال من الاحوال الاقتراب منها
سواء كان هذا الاقتراب شرعيا أو اخلاقيا أو عمليا ولا حتى ادبيا الا لمن كان مؤهلا لذلك
استفزني جدا عنوان لمقال ابراهيم عيسى(بلديات شلاضيمو)
وشغلوا مخكوا شوية
بينتقد اسرائيل ماشي
وشيخ الازهر برضة ماشي ماهو مش معصوم ومجرد بشر خاضع للانتقاد
أنما يقحم القران لية؟
انتا بتنتقد بشر ماشي اية اللي جاب القران في الموضوع؟
اية وجة التشابة بينهم علشان تحطهم في كفة واحدة؟
مما هو معلوم بالضرورة ان غالبية القراء يكتفون بقراءة العنوان وكفى
واهل مهنة الكتابة يعلمون ذلك يقينا ويتفنون في ابداع عناوينهم
يبقى اية المقصد ؟
علشان نعدل الكفة وما اسودهاش أكتر ما هي بمبي
فية شاب مذيع اسمة أحمد يونس تعرفوة
متابع الولد دة من تقريبا أول ما ظهر في الراديون
عاجبني جدا فية أخلاصة في شغلة وأنة بيبذل مجهود ممتاز
كان بيقدم برنامج الصبح في الراديو و كان ناجح
حب يشوف حاجة تانية سواء تطوير أو خوض غمار معركة جديدة
المهم راح التلفزيون وقدم برنامج مش بطال ابدا
لكن في محطة مغمورة
المهم الولد أعاد حساباتة
ولقى انة ناجح أكتر في الراديو
ومن ذكاءة ما رجعش لنفس نقطة البداية
بالعكس أوجد نقطة انطلاق جديدة
وكانت أكثر من رائعة
برنامج اسمة عالقهوة
اسمعوة
ويا حبذا اذا أتعلمتوا منة
انا شخصيا اتعلمت منة
وبناء علية
قررت اني
انطلق للفضاء الكوني بنقطة انطلاق جديدة تماما

هسرح بعربية بطاطا
اية فية حاجة

مروة الشربيني حية وشهيدة

مش هعيد كلام كتير بتسمعوة عن الشهيدة مروة الشربيني

عندي بس وجهة نظر أحب اعرضها عليكو

مروة بحياتها ووفاتها أثبتت عدة حقائق قاطعة

الحقيقة الاولى : ان الارهاب صناعة غربية بحتة ولا علاقة لنا بة من قريب أو بعيد ( رغم الأفتراءات)واذا كان أحمق زي بن لادن وغيرة(وهم في الاساس صنيعة الغرب ) لمحاربة النفوذ السوفيتي في افغانستان ببن لادن وقتل السادات الذي شق عصى الطاعة على الفاجرة( أخف لفظ ممكن) أمريكا بالظواهري وعصابتة وكانوا قبل ذلك مجرد نكرات لا شأن لها (وليتهم أستمروا)

الحقيقة الثانية: أن الشعب المصري وحدة أكرر وحدة لتالت مرة وحدة وقف ضد الارهابيين الحقيقيين(الغرب) وضد عملائة الحكومة ورئيسها ورئيس الدولة المتفرغين للسلب والنهب
هذة حقيقة سيذكرها التاريخ
ان الشعب المضهد المنهوب المقهور نصر دينة رغم ما هم فية من معاناة وقهر وابى أن يقهر بل والادهىوالمدهش والمثير للعجب والأعجاب اجبر الشعب أعدائة في الداخل والخارج في النزول على رغبتة والتسليم بكل مطالب الشعب دون قيد ولا شرط ولا مراجعة

قلت لكوا من زمان عندي أمل في هذا الشعب العظيم يرقى الى درجة اليقين

أما عن مروة فهي عند مليك مقتدر
ولا ازكيها على اللة فاللة يزكي من يشاء
لكن ازعم انها الان وفي هذة اللحظة تحديدا تنعم بصحبة الأنبياء والصديقين والشهداء

ستيتة راحت البحر الابيض تصيف وفي نيتها تقلبة أحمر مش عارف بدم مين مع اني مش مسافر السنة دي
وشوهدت وهي تمتطي موتوسيكل بيبي ياماها

وصبرني يا رب هتحصلها ومش هاين عليها تسيب النمل في حالة راحت واخداة معاها تقولش هيعوم راخر
ويقال ان المحشي في الحلل لزوم البحر
حيث افتا الشيخ البحبحاني انة لا يجوز التصييف بدون سبعتاشر حلة محشي عالبحر

دة غير اللي مزوغين دكاكيني

ماشي يا مدونين

ان ما وريتكم
واولنا اهو :الكام سمكة قرش اللي دخلوا المية الاقليمية بتاعتنا
انا اللي جبتهم اياكش يئرموكوا من مراخيركوا

هرمونات الهبل الذكوري

من خلال قراءاتي العميقة والغزيرة والكثيفة والمركزة والطويلة لعدد من الموسوعات ذات الاتجاة العلمي ومنها على سبيل المثال لا الحصر( أوم يا منيل روح فك حصرتك وما تقرفناش)
الموسوعة العالمية ميكي بأنواعها متعددة الاتجاهات الفكرية سوبر ميكي وميكي العادية اضافة الي ميكي جيب وهذا كضرب من ضروب ضرب المثل أضيف موسوعة سمير وكذلك ولا بلاش عشان ما تتعئدوش وانتو مكلعكين بما فية الكفاية
توصلت الى حقيقة علمية قديمة لكني بألمعيتي (بس ياض) مش عشان الارعة وذكائي الخارق الحارق (ياض بس) عارف اني أتهببت بس دي مجرد كبوة
الاو هي(الحقيقة العلمية)
أن لدي الرجال (يخرب بيتك) ياض أنهد وأسكت عارف أنهم انقرضوا جك فار يقرض لسانك داهون
عدد من الغدد يفرز مادة تسمى علميا ومعمليا (انا اللي سميتة) هرمون الهبل واسمة باللغة الاجنبية الاولى هابال هيرمون وباللغة الاجنبية التانية هار موناتن هبلاتن (أصلها الماني)
الجدع من دول مع عدم الامؤاخذة يتميز بأنة كما الهلف كدة طول وعرض وأذا اخذنا في الاعتبار الكرش نضيف العمق ويتميز بالذكاء الشديد من ناحية الجبهة العريضة وتحس أن راسة شبة القلقاساية الدكر يعني من الاخر أخر حلاوة وشغال بس جرب بعد ما تدفع والبضاعة المباعة لا ترد ولا تستبدل والقانون لا يحمي المغفلين
المهم بئا الجدع سالف البيان والذكر ماشي كدة يتمخطر ويقول يا ارض اتهدي ما عليكي قدي واخر لذاذة وشهيصة ومسكنيص اخر حاجة يئوم يلاقي البت من دول ماشية في الشارع زي الغزال كدة طولها مية وستين سنتي وربع وعرضهاتسعة متر ونص دة طبعا أذا اخدنا في الاعتبار التضاريس الجغرافية وشعرها لا مؤاخذة مسامير حدادي ألاووظ مقاس اتنين وعشرين وعنيها استغفر اللة مبرنئة زي المشانيء ومناخيرها زي البطاطساية وبئها أوعا يا عم الحاج شفايف بشلا ضيم وسنان مسوسة أن وجدت وفي بئها اتنين متر وتلتاشر سنتي لبان لزوم الدلع تئوم البنية فائعة الواد رمش يئوم يقع عالارض مسخسخ وتشتغل الغدد بتاعة الهبل وخلاص طب واندب
ويلبس في الحيطة
الشبكة والمهر والشقة و تشطيب الشقةوالعفش وكتب الكتاب والماذون ولفرح وبعد كل الاهوال دي ويكون الشب يا ولداة كما الكتكوت في المسقى الدخلة(انا راضي ذمتكم دة ينفع دة كبيرة يتردم علية في حفرة متر في متر) المهم الواد من جبروتة يسد ويرفع راسنا
يوم الصباحية بئا (تذكروا ما عاناة من أهوال) يقوم من النوم والولية حالتها بالبلا الازرق بعد ما البوية والمعجون لزوم الفرح ساحوايشوفها يدور في داخلة تساؤول انا عايز اعرف مين دي؟
وهنا يفيق من هرمونات الهبل
انا اية اللي وقعني الوقعة السودة دي
يلاقي بسلامتها بوزها شبرين ووشها يقطع الخميرة مش بس من البيت دة من القارة بحالها واحيانا الدنيا كلها وتقول لة بصوت حميري
طلقني
يزبهل الراجل
يا بنت ال.......... دنا اتخرب بيتي وبيت اهلي عشان الجوازة دي
يضطر انة يسايسها مع ان الود ودة مش بس يطلقها دة يطلق عليها النار من مدفع مضاد للطائرات
لية يا موكوسة قصدي يا حبيبتي
ترد علية بصوت ولا صوت الجاموسة الدكر وهي بتطلع في الروح انا صحيت مالقيتكش مجهز الفطار!!!!!!!!!!!111
يرد الشب بصوت منكسر تطفحي اية يا حبيبتي
تقولة بصوتها الحلاليفي فول بالزيت الحار وبصل وبرنجان مخلل بالتوم وطعمية
يبص لها بصة عجيبة ويقول ما يلحقش يقول يغمن عالزبون
ودي يا حضرات بداية النهاية

أتعظوا يا بهوات
وخدوا مضاد هرمونات الهبل
ودة من أختراعي
وتمنة علشان خاطركوا رمزي مية جنية للقرص
غير مصاريف الشحن
عايز اية ياض يا لمض
منا هوفر للابعد تمن الشقة وتوضيبها والعفش والمهر والفرح ناهيك عن المؤخر والنفقة والمحاكم والاقسام
لا يا عم القرص بباكو مقفول



الى معلومة العنوان ولكن الوصول اليها مستحيل
مش عايزيني اقول فيكي شعر
فمعلش بئا صابونة (لزوم الزحلئة)النهاردة

حكومة تكترونية

بلغة لكل انواع الشعب المصري
سيتم اعتبارا من تاريخة تحصيل الضرائب ألكترونيا

عندنا الكترونية عندنا الكترونية
ثواني هروح اتحزم واجي أرقص زي فؤاد المهندز تيت تيت تيت


ايتوها الاخوة المتواطنون
الاخوة في فلسطين يطالبون بحق عودة الاجئين
الاخوة برضة في مصر حسوا بالغيرة قاموا عملوا اية بيطالبوا بحق خروج الفاسدين المفسدين ويخرجوا سليطي مليطي يا مولاي كما خلقتني واللي ما يشتري يرجع من مناظرهم وذلك شريطة ان يكون الخروج جماعيا وفي بواخر ممدوح سيماعين

وشرط كمان بئا بمناسبة ان النهاردة عيد طب وعهد اللة عيد ألهي يا رب أعدمك ياللي في بالي عيد طب أقسم باللة العظيم عيد
هتسألوني عيد اية
الحقيقة اختلفت الاقوال واحد يقول عيد جواز الست الباشمهندزة الداكتورة عالمة الكيمياء المبجلة ستيتة وفي قول اخر أفتى البعض بأنة عيد ميلاد سياستها بينما بما اننا بلد بتاعة اوشاعات أحب ادلي بدلوي في الموضوع وبما اني محام ولازم يكون رأيي صادم للكافة
فأنني اعلن من موقعي هذا وانة ثبت لدينا بالدليل القاطع والبرهان الساطع وبعد فحص وتحميص(بحبة محمص الحقيقة)

ان سويادة الداكتورة قررت تطفحنا الكوتة يوووة قصدي ترشح نفسها في الاستنخابات المقبلة وبصفتها رئيسة جمعية المرأة المتوحشة قررت برضيك أنها تترشح على مقعد النواب وليس النايبات( جمع نايبة) يعني من الاخر مش هيعتئونا
وهذة تهنئة بهاذوكا المناسبة السعيدة(سعيدة مبارك)
ولكن على طريقتي
مش زي العضوات بتوع الجمعية اللي نازلين بوس مع انو ممنوع(أختشوا شوية عندنا شاب لسة ما دخلش دنيا)وأخص بالذكر انا على سبيل المثال لا الحصر

اخر حاجة بئا
اللي عندهم وعندهن مدونات ومش بيكتبوا هيدفعوهم ضرايب ولقد اذعر من انذر
واللي عندهم اكتر من مدونة وشحتفونا وراهم هيدفعوهم ضريبة مضاعفة لانهم بيتفشخروا وليكن شعار المرحلة القادمة مدونة واحدة تكفي جدا ويا ريت كل تمانية وخمسين في مدونة واحدة

وذلك مع عدم الاخلال بالمبدا القائل بأن امراة واحدة لا تكفي وان الف خمسمية تمانية وتلاتين احتمال يكفوا وان ما كفوش أغرف تاني يا عم الحاج اياكش تطفحهم

الى معلومة العنوان ولكن الوصول اليها درب من دروب المستحيل

منكن صابع محشي بس من أعر الحلة لانة بيكون ملسوع وموهوج بنار البوتاجاز مع اني موطي علية
عشان تعرفوا اننا في المشاعير اخر حلاوة

تقفيل الصومال

ملاحظ بشدة اليومين د ول أن البلد مقسومة أتنين يطلع قرار من ننوس عين أمة والعصابة الصغيرة تلاقية تاني يوم يتلغي من العتل الاكبر وعصابتة الكبيرة يعني كدة ولا كدة فية عصابة والنهب على ودنة ولا عزاء للمصريين
والامثلة كتير
هنحل مجلس الحكومة(ما ينفعش يبقا اسمة مجلس الشعب) وطلع قرار الحل خلاص لا مش هيتحل المفك اتسرق

تعديل وزاري واسع جدا لا ما فيش تعديل


حركة محافظين تشمل جميع المحافظات لا ما فيش حركات

اعضاء مجلس القضاء الاعلى اهو لا ما فيش مجلس خليهم واقفين
ولا مش ملاحظين


استعدوا ياض منك ليها

ما تتلحلحوا كدة وتستعدوا كلهاأربع شهور الوقت أزف خلاص ما فيش وقت يا دوبك كل حي يقلب نفسة واسرتة ومافيش مانع الجيران(عن طريق المواسير) والاقارب حتى الدرجة المية وخمسين

شدوا حيكوا عايزين زكايب فلوس

اة نسيت اقول لكم ان كل الزكايب دي علشان مؤتمر الحزن الوطني في 30/10




بيقول اية يا عم الحاج ويا ست الحاجة
أن المماليك اللي كانوا ناهبين مصر ابان الحملة الصليبية كانوا عبارة عن عصابات كل عصابة ليها جيش من الشرطة المقننة والخاصة(ما يعرف الان بالبودي جارد)
المماليك دول بئا كانوا بيدفعوا لجناب الوالي نظير انة يسيبهم عالشعب يدفعوا لة مبالغ طائلة وطبعا بيجمعوا من اشعب الغلبان اللي مش لاقي اللضا اضعاف أضعاف اضعاف ما غمزوا بة جناب الوالي
وأما اللماليك يتخانقوا مع بعض ياخدوا بعضهم بما غلا ثمنة مما جمعوة من الشعب ويدوة للصليبيين علشان يجوا في صف من يدفع أكثر
يعني ممكن بترول أو غاز او اة كان فية على أيامهم يا لمض
الوضع متكرر مش كدة



مشخلعكم أنا النهاردة أخر شخلعة في الالوان معظمكم خد الاجازة وبحتفل بيهم
هيصوا على راحتكم
وبلاش أحنا
اة ما عندناش اجازات فحت وردم اربعة وعشرين ساعة في اليوم
سبع ايام في الاسبوع
تلتمية خمسة وستين يوم في السنة
ألهي كلكم تنجحوا وتتخرجوا وتتنيلوا قصدي تتجوزوا
وأفرح فيكم ونتم طافحين اكوتة زي حالاتي

ينفع كدة؟

اية اللي بيحصل دة ؟
للدرجة دي
دي مش بس نكسة دي وكسة
سودة ومهببة ومطينة بطين
أنا كنت فاكر اننا اتهزمنا في معركة والان نحن في مرحلة تجميع القوات استعدادا للمعركة الفاصلة
لكن ما حدث اربك كل حساباتي
السيد احمد عبد الجواد(سي السيد الاصلي) جاني في المنام وراح خابطني بالعكاز بتاعة على نافوخي وقال لي قوم فز يا مدهول شوف المصيبة
انا بصراحة بعد ما دماغي أتفحت ازبهليت
اية اللي حصل
الراجل( سي السيد) راح فاتح اللاب توب بتاعة وموريني الخبر المأندل
ال اية
واحد أتخانق مع مراتة عادي جدا واية يعني
ال حب يصالحها بسلامتة
ماشي النهاردة الخميس وعادي يعني
يصالحها
يهبدها بأيد الهون او شاكوش لزوم المناغشة مثلا
أويتجوز عليها ومالة
احتمال يطلقها وبعيدين يردها شغال برضة
أنما تبلغ بية الجرأة انة يأجر أعلان ومش بس كدة لا واية ويعتذر لها علنا!!!!!!!!!!
لية كدة يا عم الحاج
أحنا ناقصين بهدلة
طب نرفع عينا في عين الحريم تاني ازاي
منك للة يا مفتري
والست ال اية قبلت أعتذارة
اية كان ناقص كمان ما تقبلش
وحد في الدنيا يأجر أعلان على عامود نور عشان يصالح مراتة
عنها ما أتصالحت يا اخي
وطلع ركب الاعلان على عامود النور ازاي
طبعا عمل زي اللمبي وهو جايب الورد لمراتة ووقع على دماغة كام مرة وبدل ما يفوق ال مكمل
طب أسأل يا أخي
دة أحنا رجالة زي بعض
سي السيد من قهرتة مات تاني

وطبعا الحريم كلها هتطلع في شغلانة عايزة من دا

أنا عن نفسي وبصفتي اخر عنقود سي السيد احمد عبد الجواد أعلن الحرب التي لا هوادة فيها
ويا اما النصر يا اما نشوف دكتور ونقلب بئا
ما هو ما ينفعش كدا ابدا
عامود بحالة يا مفتري
طب أصبر شوية وأما تتكل هات لها ربع عمود في الاهرام صفحة الوفيات او سطرين
مثلا
ذهبت الى غير رجعة فلانة الفلانية وانا حاليا ارمل وعايز اتجوز وتحدد صباح باكر لعمل مناقصة على العروسة وتسحب كراسة الشروط نظير مبلغ كذا وتحط رقم الموبايل دة مثلا مثلا
أنما وهيا عايشة تجيب لها عمود بحالة دة حتى فال مش ولا بد

يعني قوانين الاحوال السخصية في صفهن
والكوتة( لا مش علشان مطفحينا الكوتة) الكوتة بتاعة البللمان
ودلوقت كمان عواميد

وأحنا متقطعين في الاكياس


غطوني وصوتوا

يا أرض أخسفي ما عليكي

ابو طويلة
تعرفوة؟
واحد كدة طويل زي الليلة السودا أضافة ان ملوش لازمة يعني ممكن يتشال من قاموسنا ولن نجد أي تغيير
طلع علينا بحتة دين نتفة تصريح
ال اية يا أخوانا
الموظفين في الدولة بياخدوا تمانية وتلاتين مليار جنية سنويا مرتبات
بس يا معلم
وسكت
المفروض بئا اية ان الموظف ابو متين ملطوش في الشهر يحس على دم اللي جابوة ويما يفتحش بئة بأي مطالب اة تمانية وتلاتين مليار يابن ال........ وياكل ويشرب ويركب مواصلات ويتجوز ويعلم العيال بهذا المبلغ الطائل
طب مش يفنط المسائل كدة أبو طويلة
يعني كدة ومن الاول مين الموظف اللي بيقصدة رئيس الدولة ولا الوزرا ولا مستشاري الوزرا ولا سكرتيرات كل ما سبق
ولا قصدة رؤساء المصالح الحيوية في الدولة ولا كبار ظباط الداخلية رؤساء مجالس ادارة البنوك مثلا ولا محافظ البنك المركزي
ولا الكتاكيت الامامير ولاد ال........وزرا وأسافل القوم
بحسبة بسيطة جدا تمانية وتلاتين مليار على عدد الشعب مش الموظفين بس تمانين مليون يبقا كل بني ادم في مصر ياخد كل شهر ربعمية خمسة وعشرين جنية يعني الاسرة المكونة من اربع افراد تاخدألف وسبعمية جنية من أول رئيس الدولة لحد ما نوصل لبهانة بتاعة الكرات
بلاش الحسبة دي اصلها عادلة زيادة عن اللزوم
عدد الموظفين في الجهاز الاداري للدولة مجهول لكن أقصى تقدير للموظفين خمسة مليون نقسم التمانية وتلاتين مليار على الخمسة مليون يطلع لكل موظف كام في الشهر سبع تلاف وستميت جنية في الشهر اهو وانا سايب ايديا من غير قرية ذكية ولا يحزنون (ربنا يحزنكو دنيا واخرة يا بعدا) يا بتوع الحكومة
يعني لو الراجل ومراتة بيشتغلوا في الحكومة بيكون دخلهم الشهري خماشر ألف ومتين جنية
دة بيحصل؟


أدي اللى عايزينا نصدقة!!!!!!!

قولوا انتوا الحقيقة اية

وشوفوا مقدار الجور والظلم والخلل
وليحاسب كل ظالم
ماهو هيتحاسب هيتحاسب
ويا ويلة
بئا يا ابو طويلة قارفنا بالقرية الذكية والحكومة الالكترونية وفي حتة بيان مالي تافة كدة تبان على حقيقتك انها حكومة الولية بتاعة الفجل مع الاعتذار للاخيرة لانها شريفة وبتاكل من عرق جبينها ومكسبها يا دوب ملاليم
عكس الاولى على طول الخط

يا ما دقت عالراس طبول

العبد للة مواليد 1963
فاكر كويس جدا في1967 و كان عندي اربع سنين الا شوية الحزن والهم اللي كان في عين والدي ووالدتي
فاكر كويس صفارات الانذار أما يكون فية غارة جوية( كانت عبارة عن صوت جعور ي) متقطع وأحنا في قلب القاهرة وكلنا ننزل للادوار الاولى علشان ما نموتش
وفاكر طشاش كدة الاحاديث بين الناس كلام كلة تحدي وغيظ ورفض للهزيمة
وفاكر صفارة الامان اما الغارة تخلص(نفس الصوت الجعوري لكن مستمر بدون تقطع)
بعد شوية بنو قدام كل البيوت سواتر من الطوب علشان الناس تحتمي بيها لو الغارة جت والناس في الشارع
فاكر تحويل الجاراجات(اة على ايامنا الادوار الارضية كانت جراجات) الى مخابئ يلجأ اليها سكان الادوار العليا وقت الغارات
فاكر كويس جدا أما جابوا مدفع مضاد للطائرات وحطوة بين البيوت علشان يضرب الطائرات المهاجمة أي نعم ما قعدش كتير بس فاكر شكلة الرمادي الكئيب
ما أعرفش بقيت الاولاد كانوا بيفكروا ازاي لكن عن نفسي
كنت بقول في داخلي أصبروا كلها كام سنة وهجيب لكوا حقوا واطلع عين ام اليهود
فاكر كمان الصويت من البلكونات أما عبد الناصر مات
والناس ماشية في الشارع تبكي والنسوان بتصوت ولأيام متواصلة
والبلد كدة عبارة عن ميتم كبير
ماكنتش فاهم حاجة بس حسيت بالحزن ماهو الناس كلها حزنانا هعمل فيها فلوط معاهم يا عم الحاج


وفاكر في 1973 كنت رايح المدرسة الصبح الجيران رجعوني وقالوا لا المدارس قافلة الظاهر الحرب قامت
كنا في رمضان
فاكر بعد الفطار والبيانات العسكرية بعد شوية قالوا اننا انتصرنا
فاكر الطوابير بالساعات واحيانا بالايام علشان كيلو سكر والناس بتقول مش مهم نستحمل المهم ينتصروا

شعوري الشخصي بصراحة اتضايقت وزعلت
اة واللة
مش قادرين يصبروا لحد ما اكبر و أنتصر انا
اية الخيانة دي
فاكر كويس في بلدنا في الصعيد والدي خدنا ورحنا نعزي فاكر طراطيش كلام كدة عن ناس ماتت(استتشهدت) في سبعة وستين واهاليهم ما معملوش العزا غير في تلاتة وسبعين اة صعايدة بئا وعارفين نظام التار

ادي طفولة جيلي يا حضرات ومستغربين أوي اما احكي لكم على شقاوتنا طبيعي جدا
مش بئول لكم ياما دقت عالراس طبول

مالكم متدهولين كدة(أختزلتوا كل حاجة في ماتش كورة)
ما تسترجلوا شوية (بلاش الحريم تسترجل استجدعوا بس أصلها مش ناقصة)كل واحد من موقعة ومن غير دوشة وكلام كتير
يصلح نفسة
نفسة بس
كل حاجة بعون اللة تتصلح
ماهي مصر أحنا
انتم وأنا

ضد التيار

أهو في الوقت دة تحديدا وبالفم المليان

بحبك يا مصر
----------

الحب مش انك تحب في السراء وفي الضراء تخلع
لا يا عم الحاج بالعكس تماما
دة في السراء تخلع
ووقت الشدة توري حبيبك بتحبة لاي درجة
دة الحب على حقيقتة
أتعلموها بئا
هفضل اعلمكوا لحد امتا

كربنكل في الموخيخ

* اتنين بعتبرهم عقل وضمير ولسان حال
مصر
الاول أحمد فؤاد نجم
التاني عبد الرحمن الابنودي

* الناس عمالة تسأل مين ممكن يكون رئيس مصر القادم اية رأيكم في حمدي قنديل؟

*مبارك يهنئ المنتخب!!!!!!!!!
المنتخب يهدي الفوز لمبارك!!!!!!!!!!
طب والشعب اية صابونة كالعادة

أـحمد عز يجتمع لتحديد المرشح القادم للرئاسة
أحمد عز يجتمع لتحديد من يسترشح للبرلمان
احمد عز يجتمع لتحديد اسماء السيدات الجدد للبرلمان
أحمد عز يجتمع لتحديد اسماء أعضاء مكتب نقابة المحامين
هوا فية أية ؟
صبي العالمة اللي طولة بالكتير متر الا ربع منه خمسة وخمسين سنتي مناخير بئا مصر ولا اية
خايف الماتش الجاي خاصة انة مع امريكا أحمد عز يجتمع مع الجهاز الفني لتحديد أسماء الاعبين وطبعا النتيجة معروفة
زي ما بيحصل للبلد كلها خيبة بالويبة
ومزيد من الثراء لهم
ومزيد من الخيبة لنا

*حاجة اخيرة بمناسبة الافراح واليالي الملاح اللي من غير مناسبة وبعد التأمل في أحوال المصريين ومصر وبعيدا عن الكورة تماما

يا حبيتي يا مصر

يعجبني ولا يعجبني

مش جاي لي نوم الظاهر بحب جديد


عاجبني اوي موقف الراجل اللي بعد تلاتين سنة جواز مع الفقر قال لمراتة بعد ما ربنا كرمة وبئا غني انتي تعبتي معايا أوي يا أسمك اية
ولازم ترتاحي كفاية جدا اللي عشتية معايا روحي وأنتي طالق
مش عارف كل ما أفتكر اني ممكن أعمل كدة في مراتي أسخسخ على روحي من الضحك (مسيري أعملها )

كل ما أسمع ان المغفلين زادوا واحد( واحد اتنيل واتهبب واتجوز)بتجيلي حالة اكتئاب نفساوي من كام يوم كنت ماشي في جوازة واحد قريبي أتاخر على الميعاد قلت الحمد للة الواد عئل بس جة متأخر قلت لة بعلو صوتي يا راجل انا قلت انك عقلت طبعا المأذون بص لي شذرا جذرا وابو العروسة لكن انا بجح شوية لا كتير بصراحة قلت لهم اية فية حاجة والظاهر كان باين عليا اني ناوي اتخانق فلمو نفسهم وبعدوا عني

الكلام ليا يعني يا فالح ما كنتش عارف تعمل كدة يوم ما أتهببت


العيال اللي بتستمحن دي ومالية الدنيا سريخ ألحقونا هاتوا لي أمي من عالقهوة مالكم فية أية ما تستمحنوا وتتنجحوا واللي مش عاجبة يروح يشوف طلبة حقوق وهما بيذاكروا في المتوسط كام الف ورقة ويمتحنوا( عدد عشر مواد كل مادة في المتوسط تسعميت صفحة شوفوا يطلعوا كام) وبينجحوا
عادي خالص
وبالهنا والشفا
وبعد ما تتخرجوا أتعودوا ما هو كل يوم فية سبع تمن أمتحانات ومن غير ما تذاكروا


اليومين دول حر أوييييييي وانا راجل ما بحبش التعقيدات في الصيف بحب الشتا وفي الشتا بحب الصيف وبيقول لك اية بئا بلاش التكييف علشان الانفلونزا بتموت أسرع فى الجو السخن طب أعمل اية قدامي أختيارين يا أموت من الحر يا اموت من الأنفلونزا طب الاتنين مش عاجبني حلوها أنتو بئا


حكاية ماتش مصر والبرازيل اية فية اية الناس فرحانة أوي كدة لية سؤال قبل الماتش كانت اية التوقعات طبعا هنتغلب كويس خالص بعد الماتش النتيجة اية أتغلبنا
طب اية فية اية
اية الخيبة اللي من وسع دي
بنربي العيال على الفشل روح الامتحان يا روح مامتك و وأوعى تسقط في كل المواد اسقط في مادة واحدة بس والبيت كلة يفرح والوالدة تتحزم وترقص والوالد من فرحتة يرمي عليها اليمين واحتمال الشمال (من قرفة) طب والمحصلة اية مادة زي عشرة سقط وهيعيد السنة
اية الخيبة دي
وبعدين نشتكي الدنيا اتشقلب حالها ما أنتو اللي شقلبتوة
الفشل يظل دائما وابدا فشل بصرف النظر عن حجمة مهما حاولتوا تجملوة وتشيكوة
يا افاضل يا محترمين سمو الاشياء بمسمياتها علشان تنفعوا
ربنا بيقول في كتابة اية عن المنافقين
(في الدرك الاسفل من النار)
يعني ألعن من الكفار لية بئا
فكروا
ولا بلاش لتقولوا حاجة كدة زي اللي قلتوها على هزيمة البرازيل
لان الكافر ممكن يكون جاهل او غبي أو بيعند
انما المنافق فاهم وواعي وعارف الصح والغلط ومن حمرية اهلة بيعمل الغلط ومش أي غلط لا دة الغلط الاكبر
وبرضة بيدلعة ويسمية حاجة تانية غير اسمة الحقيقي

فهمتوا
أحسن برضة

مصر

الحاجة الوحيدة اللي لفتت أنتباهي في ماتش مصر والبرازيل بصرف النظر عن الكورة واللعب والاعبين والمدربين والنتيجة
حاجة واحدة بس
قبل ما اقول لكم عليها
فية محطات في حياة اي بني ادم
المحطات دي بتغير نظرتك لكل الامور وتتوضح قدامك حقائق قد تكون واضحة وضوح الشمس لكنك لا تراها
مش شرط أنها تكون أشياء ضخمة وصادمة بالعكس دة أحيانا بتكون اشياء صغيرة جدا لكنها ضخمة جدا في تاثيرها
دموع المشجع المصري بعد مصر ما تعادلت بالجون التالت
للدرجة دي بنحب مصر؟
أنا حاليا في مرحلة الاستيعاب ولم اصل الى اي نتائج
لكن أكيد فية مصريين المشجع دة يمثلهم وهم أغلبية الشعب المصري
وفية خونة يمثلهم الجاثم على صدر مصر ومن والاة من أسرتة ووزراءة الى أخر هذا العنقود القذر النجس
وهناك ثالثا الدهماء ودول مع الرايجة لوالمصريين هم من يحكمون يكونوا مثلهم ويقتدوا بهم وينصلح بهم حال البلاد والعباد ويعم الخير والرخاء و تسود القيم الحميدة
وأذا كان الخونة هم من يحكمون نفس الشئ يكونوا مثلهم ويقتدوا بهم ويعيثوا في الارض فساد وأفساد ويعم الخراب ونبتلى بالوباء والغباء والبلاء
أعتقد ان سيد درويش عندما قال من قرن من الزمان
قوم يامصري .............الى اخرة
ومات سيد درويش مدمنا للمخدرات يأسا وقنوطا وكمدا وهما وغما وحزنا
يا ترى هيبقا حالنا من حال الشيخ سيد درويش
و لا المصري ناوي يقوم

هوا فية اية؟

أنفلونزا الطيور
قالت حكومة سنية في سبب توطنها مصر أن الناس من جهلها بتنيم الفراخ تحت السرير؟
على مضض طيب
أحتمال ماهي أنتشرت في العشوائيات حيث الجهل والتخلف والاهمال(كل دي صفات للحكومة والحاكم وليست للشعب)منعا للبس أو القلع
أنفلوانزا الخنازيرأو الحلاليف
ابتدت من الجامعة الامريكاوية وتوطنت الزمالك ورايحة المعادي بتاكس من الجداد
لية بئا؟
لا فية جهل ولا تخلف ولا عشوائيات(المرة دي أقصد الشعب)
اللي عاجبة
كل ماهو سئ للحكومة وكل ما هو غير ذلك للشعب
يلا مش مشكلة
المهم نتشرف بدعوتكم لحضور دخلة الطيور على الحلاليف أملين ان يكون نسلهما انفلونزا تبيد كل من تسبب في خراب وشقاء وتعاسة وظلم مصر والمصريين
ملحوظة :هاتوا الموبايلات اللي بتصور وهيصوا واتفرجوا وصوروا وسجلوا ووروها لصحابكو وبلوتوث و و و براحتكو عالاخر
يعني هيبقا موت وكبت


بمناسبة ظهور شلاضيمو
ليا تعليقين عالماشي
الاول يحي العظام وهي رميم
التاني كان قاعد فوق السد لية؟
هل لانة كان ناوي يريحنا وينط ونظرا لانة منوفي نتن جتتة هتسسم مية النيل ويسمم الشعب كلة بالتالي
ولا ضحكوا علية وفهموة ان انفلونزا الخنازير ما بتطلعش فوق السد طب يا رب الانفلوانزا تطلع وانتا ما تعرفش تنزل



اخيرا وليس اخرا
فية مرض اسمة بالفرنساوي
sclerose multiple
اللي يعرف يعني اية وأعراضة ومدى خطورتة يفيدنا أفادكم اللة وطبعا بالعربي



والشئ بالشئ يذكر
ما أخدوتش بالكوا أمبارح من أبو طويلة وهو عمال يلف البلد من فوق لتحت ومن الشمال لليمين وكتكوت عين أمة قاعد ورا أبوة زي اللي أبوة عكشة وهو بيشرب سجاير في الحمام أو لا مؤاخذة مسك الشهادة وهيا كلها كحك والواد ابن العبيطة مخبيها بالمناسبة مش شلاضيمو عندو جوز خرفان قصدي شباب دخلوا الجيش ولا لأ ومضوا الجيش فين وأتجازوا ولا لأ ههههههههههههههه
اة طبع راحو الجيش تجيش............. ااقول لك
شايفين شغل المنايفة اللي على حق
حتى عيالهم بيفرموهم
طب يا شلاضيمو
عيب عليك ياض
اية يعني أما الواد ابنك طلع اشاعة انك أتكومت وانة بئا الكل في الكل
واية يعني اما الوزرا حلقوا لك وجريوا ورا الكومندا الجديد وصدروا لك الطارشة
ما تسيب الواد يلعب بينا شوية يعني جت علية يعني استحملناك تمانية وعشرين سنة على غتتاتك ورخامتك وفقر الست الوالدة الدكر مش هنستحمل كميلة امة
اللة يخسف بيكوا الارض يا بعدا
بئول اية
تعالوا أركبكوا كلكوا كدة بربطة المعلم حصنة وربنا يقدم ما فية الخير

من قعر الذكريات(الجزء التاني)

ازيكم
عارف ما تردوش
تعالوا اخدكوا على مشمكوا في رحلة الى الزمن الجميل
كان عندي بتاع سبع تمن سنين كدة وجدي كان ساكن في الزتون وبعد ما جدتي توفت أتجوز وخلف أربع عيال زي أبويا بالظبط(كانوا بياكلوا اية العالم دية) المهم كنا في زيارة عندهم وخدت الواد عمي اللي هوا أصغر مني بشهر ونص بالتمام والكمال ونزلنا نلعب في الشارع وطبعا جاب اصحابة وبقينا شلة وكان عند الواد عمي دة عجلة أنما تحفة بأربع عجلات ودركسيون وألوانها جميلة جدا حاجة كدة زي العربية لكن ببدال وكان البيت يطل مباشرة على شريط قطار الضواحي (في عصر ما قبل المترو)المهم لعبنا شوية كتير بالعجلة
طبعا متخيلين اللعب ازاي انا سايق والعيال وعمي مسموح لهم انهم يزقوا وبس
أنما اللي يفكر يركب أرزعة علقة تشيب الكتكوت
المهم زهقت وأصابني الملل والعيال اتبهدلت من كتر الزق والضرب وجالهم ما يشبة الاعياء
وهنا تبدأ صفاتي الملائكية في الظهور
لميت العيال وقررت الاتي
نمشي العجلة على شريط القطار بحيث اما يجي القطار يزقها وبسرعة (شايفين بوادر العبقرية) بدل العيال اللي نفسها مقطوع دية وبدون أي مناقشة من العيال لان اللي بيناقش ينضرب مني هوا كدة مش بقول لكم عيل ملاك
المهم بدأت خطوات التنفيذ العملي للاختراع
وواجهتني أول مشكلةواخر الحقيقة
ان كاوتش العجلة مش منفوخ هوا زي اليومين دول لا الكاوتش مسمط ولاحظت أن القطار أثناء مرورة من غير كاوتش يبقا اية العمل؟
طبعا نشيل الكاوتش
حاولنا ما فيش فايدة الكاوتش سميك ومش راضي يتفك أبدا بالعافية شلنا منة حتى صغيرة جدا
طب وبعدين الاختراع هيبوظ كدة وشكلي هيبقا وحش قدام العيال
المهم لقيت الحل نولع في الكوتش وبكدة ننهي عالمشكلة مش فاكر جبنا بنزين ولا جاز ويمكن سبرتو لزوم التفيذ ورحت قالب العجلة وخلي الكاوتش لفوق ومغرقة بالجاز وطبعا العجلة كلها أتغرقت وولع يا عم الحاج
أنا فاكر ان اللي هيلع الكاوتش بس لكن القدر لعب لعبتة العجلة كلها ولعت وأتحرقت وبقت فحمة وللعجب الكاوتش ولا جرا لة حاجة يمكن لان الناس كانوا بيحاولوا يطفوا الحريقة اللي ولعت لوحدها!!!!
اة لوحدها
دة أنا بكلم والدي وهو بيستفسر اية اللي حصل
وكانت هتعدي
لولا الواد عمي أر لجدي بالحقيقة وطبعا الاخير قال لوالدي وكانت النتيجة زربو
كف مفتخر على صدغ العبد للة فشلت كل محاولاتي المستميتة لتجنبة وفضلت وداني تصفر بتاع شهر
وطبعا نتيجة للظلم البين دة فقدت البشرية أعظم عقل مخترع في القرنين العشرين والواحد وعشرين
بعد أن أعلنت التوبة النصوحة عن الاختراعات(الخاصة بالعجل بس) بعد أن أفاد ابويا وجدي ان النتيجة الوحيدة لأختراعي ان القطار كان هيفرم العجلة والعبد للة ويخلينا كفتة
ونقلت في مرحلة تالية للموتوسيكلات
بعدين أحكي لكو
وهيجي اوان العربيات برضة
بس للاسف
ما دخلتش عالطيارات
بس ليا مغامرة مع البيتش باجي
الصيف اللي فات
خدوها عالسريع
ولا بلاش الترتيب كويس
حلو التشويق دة
يلا صباحكو فل
روقوا كدة وصلوا عالنبي ماحدش واخد منها حاجة
لان شلاضيمو ما سابش حاجة لحد

من فضلك بوز او ابتسم

خبر حلو جدا
انفلونزا الخنازير جت مصر هييييييييييييية ومن حداشر يوم أحيييية ومخبية أصلها شافت استقبال باراك اوباما وهيا زي ما أنتوا عارفين بتختشي شوية وما فيهاش نفس تطلع السلالم بسرعة فدخلت من سكات
طب واية الحلو في كدة يا فالح؟دة انتو بلماضتكم اللي بتقولوا
أنها جاية من عند الحبايب مش حبايبنا حبايبهم امريكا وأحتمال كبير تكون جت مع بتاع السلا لم رهوان
فهمتوا
أنا عارف اخر ذكاوة
كل من سلم على امريكاوي او باسة او ايحاجة تانية في الزيارة الميمونة(مش القرد) وأحنا اش عرفنا اية اللي حصل في الغرف المغلقة أحتمال كبير يكون لقط العدوى
مش بقول لكم خبر حلو بس اللي يفهم

خبر بئا أحلى وحلة
الجزائر كسبت الماتش وبفضيحة
تقول جوزية المدرب الفعلي مشي والحرامي قصدي المعلم أتكشف
او تقول ان اتحادالنصب داق نتايج هبلة ومحاربتة الفجة لصاحب أنجازاتة غصب عن عينه واقصد النادي الاهلي
مش مهم
المهم ان لو لا قدر اللة الفريق اللي بيمثل مصر كسب كان ولاد الحرام فورا غلوا اسعار كل حاجة على الاقل سبعين في المية
فاكرين سمير غانم وبنتة نفيسة في السرحية كفاية بئا يا نفيسة
انا بقولها للحكومة
كفاية بئا يا حكومة أرحمينا هنفطس خلاص
المهم
فوز الجزائر شئ مبهج للمصريين على مستوى الاسعار والمعيشة بس أنتوا اللي مخكوا على ادة


سؤال بينئح عليا
الجزائريين عايشين أزاي؟
هيسمعوا أغنية ما شربتش من نيلها اللي صاحبتها حفيت علشان تولد ابنها في أمريكا علشان الجنسية وما عرفتش؟
هتغني لهم البت عجرم اللي وزنها ستين كيلو منهم خمسة واربعين سيليكون؟
المعلم صاحب القهوة هيطلع يتحفهم بأراءة السديدة وان ربنا معاة وهو لابس في رقبتة جنزير دهب تقولش روي بتاع صالح سليم؟
الاجابة على كل ما سبق لأ
طب يبقى دة مكسب
الجزائريين صعبانين عليا جدا

الحمار على مين؟

بيقول لك اية يا عم الحاج
ال اية في القليوبية جمعية أسمها ينابيع الخير عاملة مشروع لحملة المؤهلات العليا قدرة فول
اية
ايوة قدرة فول
تقدم خمسة وعشرين شاب غالبيتهم من حملة المؤهلات العليا وعدد قليل من حملة المؤهلات التوسطة
لحد كدة ورغم غرابة الخبر
يعني العيال دي أتعلمت بكام
وخدوا دروس بكام
وضيعوا من عمرهم اد اية
وأهاليهم شافوا المر لحد ما اتخرجوا ازاي
وأتكلفوا كتب وكراريس واقلام ونجاح وسقوط ورايح المدرسة وراجع من الجامعة وأمتحانات وأجازات ورحلات وهدوم وجزم وشربات وسهر ومذاكرة وقلق(ربنا يحرق قلبك يااللي في بالي)
لكن ماشي
ال اية بئا الجمعية بتدرس الحالة الاجتماعية للشباب دول قبل ما تديهم عربية فول بمشتملاتها
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
اية يأخوانا
اية الهبل دة
هنستعبط
عربية فول وبمشتملاتها يعني اية
معقولة الاستهتار يوصل للدرجة دي
وينابيع وجمع مؤنث سالم بتاع الذنكرة
أمال لو ينبوع واحد كانوا هببوا اية
بلاش ينبوع لو بير وفية مية معطنة كانوا عملوا اية
واي اهانة
وأي مهانة
وأي استهزاء
الحمار على سن ورمح يتقال علية مشتملاتة
لية
علشان الحمار الكبير بعافية شوية تتجرأو على الحمار وتقولوا علية مشتملاتة
عموما الحمار الكبير راجع وان ما رجعش في ستين خرارة الجحش الصغنن موجود ويسد
وهيوريكوا يا غجر
ال مشتملاتة ال
هزلت وتأدنلت

ملحوظة رفيعة

الاخوة الستات والبنات ما شافوش من باراك لا مش ايهود باراك بتاع أسرائيل باراك أوباما بتاع أمريكاهيا اي نعم ما تفرقش بس اللي ركزوا معاة أوي أنة اسم اللة علية وعلى اللي جابوة بيطلع السلالم فوريرة
بس كدة دة اللي شافوة
طب وأية يعني انا اعرف واحد بينزل السلالم أسرع من كدة بكتير
هو اي نعم بينزل زرع بصل بس بينزل بسرعة
الصراحة هو بيتكعور لكن بينزل
مش عارف اية اللي بيعجب في طلوع السلم بسرعة
حد يفهمني
مش عارف عمالين نتأمر عالواد أوباما الامارة دي كلها لية هو حد منا قفشة في خرابة ولا حاجة؟
الواد ريس أمريكاوي منتخب علشان يشوف مصالح أمريكا والامريكاو بنلئح جتتنا عالواد بأمارة أية
متهيألي كدة أنكو ماسكين علية ذلة ومخبيين عليا طب ما تقولوا اذلة شوية معاكو
ولا ماليش نفس
بالمناسبة لكل المأملين في باراك

يا مستني السمنة من بطن النملة عمرك ما هتقلي

ممكن تشوي وصحي أكتر

بيان هام

تعريفات هامة
قوات العدو: مراتي وأهلها
قواتنا: العبد للة منفردا(لو حد عايز يساعد يا مرحبا)وما فيش تأمين صحي


في ساعة متأخرة من مساء اليوم قامت قوات العدو الغاشم بشن هجوم مسلح بكافة الاسلحة على قواتنا الباسلة
ونطمئنكم أن قواتنا(الى الان) صامدة وتقاتل بشراسة منقطعة النفس وأن قوات العدو تكبدت خسائر فادحة في العتاد والمعدات وان قواتنا صامدة رغم خسائرها في الارواح(خلو عندكو دم وساعدو)
وسنوالي في بياناتنا التالية موافاتكم باخر المستجدات
برجاء التوجة لاقرب مستشفى والتبرع بالدم فورا

بيان رقم 2
_____
قواتنا الباسلة صدت هجوم العدو وأجبرتة على الانسحاب الى الفسحة(الريسبشن)ويحاول العدو الان تجميع قواتة أما قواتنا فزي الفل
يا مواطنين ملاحظ أنكم مكبرين دماغكو
ماشي هخلص عليهم وافضى لكو(أن ما وريتكو)
اة بالمناسبة وقعنا للعدو ستة وتمانين طيارة
اية في حاجة
اللي مش مصدق يجي يعد ورانا

بيان رقم3
_____
قوات العدو تعاود الهجوم على عدة محاور وخاصة القطاع الاوسط وقواتنا متحصنة في الحمام أحم قصدي مواقعها الحصينة وقافلة الباب كويس أحم قصدي متمكنة من دفاعاتها
وملاحظ ان الشعب مكبر دماغة عالاخر
ماشي يا بشر
اة وقعنا ميت طيارة
ورق يا أخونا ما تستغربوش

مارشات عسكرية وقران
!!!!!!!!!!!!!!!!!!!!!!!!!!!!!!!!!
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


بيان رقم4
______
ايتها المواطنون الاي كلام الريس عايزكم في موضوع رفيع كدة وهيرزعكو بيان هام عن أخر المستجدات على الساحة العالمية والموضيع ذات الاهتمام المشترك






خطاب الريس للمواطنين
الاخوة والاخوات طبعا انا جمعتكم لاني عايزكم في مصيبة لو حاجة عليها الطلاى هعوزكو لية يعني
الجيش أتدمر تماما
والمعركة خسرناها
وخدنا حتة دين علقة موكن
بس ما تخافوش أنا كويس
وجة وقت الحساب
طبعا أنا اللي هحاسبكو
انتو مين علشان تحاسبوا الريس يا.........
طبعا واخدين بالكو من اللون الازرق ودي مقدمة لاني هوريكو الزرقان اللي على اصولة
اشمعنى أنا
طبعا أنتو المسؤلين عن الهزيمة وهدلعها وأسميها الوكسة مش كل واحد فيكو لية أسم دلع؟
أشمعنى الوكسة ما تتدلعش مالهاش نفس ولا اية شعب غريب مهزوم وبيتلامض
أن ما وريتكو بعديا بريس هيجيلكوا واحد يطلع على جتتكو البلا الازرق
طبعا وعلشان أنتو سبب الهزيمة
نصكوا هيعدم ودة النص اللي رحمتة
النص التاني هسيبة لبعد اللي بعدي
أي انتقام
تصدقوا النص التاني صعبان عليا أوي
يلا أنزلو الشوارع وهيصوا واحتفلوا
أني قاعد يا..........

الولية أبلتينها لدع

http://www.youtube.com/watch?v=UzN3lbrDPMI
ايتها السادة والسيدات
نبلغكم بالبلغة التالية\ الولية لسعت ودخلت مستفشا الامراض الاستنجلينا
ودة طبعا مش لانها أنضمت للحزن الوطني
ولا لجنة السياسات
ولا طبعا لانها أطلعت على أحوال الشعب المصري الشكيك
الحكاية أنها خسرت المسابقة

الظاهر أن بتوع برة طلعوا زي بتوع جوا بيبصوا للمظهر وبس

أن ما وريتكم الجنان الاصلي

أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟
أول حاجة أني أبقى الحاج متولي اتجوز حريم حلو كدة ورا بعض
تاني حاجة أني ابقا رئيس جمهورية وهوريكم أي حد يبعت لي تاج هشألطة في أمل الدولة
تالت حاجة بئا ماسورة بنات ضاربة اة فيها حاجة دي زي المية كدة تغرق الدنيا
رابع حاجة بئا يحكموني في العصابة اللي ماسكة البلد يا ليلة طين يا ولاد على دماغ اللي جابوهم
خامس حاجة اني أعرف انام عشر ساعات على بعض من غير ما حد يصحيني
التعديلات
اول حاجة بلاش مرات الحاج متولي التانية أصلها سكة أوي
تاني حاجة بلاش رئيس جمهورية أصلي حونين أوي ومش هعرف أطلع عينيكم
تالت حاجة بلاش ماسورة البنات الضاربة دي اصلي عجزت خلوها ستات أوسبعات او تمنيات
رابع حاجة دة ما يتعدلش خالص سيبوة زي ماهو كدة
خامس حاجة بلاش عشر ساعات ممكن اتناشر
أذكر خمس أحلام على الاقل تخص مستقبلك
مستقبل اية بعد الخمسةوأربعين ما خلاص اللي حلم حلم من زمااااااااااان
اة فية حلم أتجوز مضيفة جوية أو أرضية بحرية ماشي يا عيني بئا لو بر مائية
اذكر شخصين على الاقل متواجدين في حياتك حاليا كنت تود وجودهم قبل الان بزمن
ابني وبنتي كان نفسي أعرفهم وأنا من سنهم علشان أديهم حتة دين علئة أنسيهم اسم اللي جابهم ولاد ال..................
أذكر شخصين على الاقل غير متواجدين في حياتك حاليا كنت تود وجودهم الان او في حياة أولادك مستقبلا
أيوة كدة دة سؤال حلو أجابتة ما فيش حد لية لانة مش بمزاجي انما لو بمزاجي الاخ هولاكو والاخت الفاضلة أمنا الغولة
تمرر التاج دة لمين
يا عم واللة ما مررتة هوا مر طبيعي عندكش سكر من بتاع التومين نحلية

هو أنا مت ولا اية؟

وما زلت أتعلم بعتت ليا تاج
موضوعة احلامك وأمنياتك الماضية والمستقبلية
ما تحقق منها وما ترغب في أن يتحقق
بئالي تمانية وأربعين ساعة بفكر (فى أوقات فراغي طبعا)
النتيجة أذهلتني أنا شخصيا
لا شئ
تصدقوا
ولا بحلم ولا عايز حاجة
مش بيقولوا لو بطلنا نحلم نموت
طب أديني مبطل أحلم ومن غير ما اخد بالي
يبقا أنا مت ولا أية
لو مت أقروا لي الفاتحة وأطلعوا على روحي بشريك من أبو زبيب من فرن الجهاد اللي في الدقي وتعملوة وصاية بلاش الحركات دي
ويا حبذا اذا كان معاة بلح أبريمي ومية معدنية نوع كويس أخوكو مزنوووووووووء
وكلنا هنتزنق الزنئة المنيلة دي
تصدقوا بايني مت بجد
اة ودخلت النار كمان
ما تفهمونيش أن شلاضيمو من أهل الجنة
ولا خلء العصابة بتاعتة هيا كمان من أهل الجنة
ولا المدهول اوباما من أهل الجنة
ولا بتاع السكافة اللي بالاضافة لانة ما بيعرفش رايح يعتذر لليهود على اية يا بن ال....
أذا كانوا ما أعتذروش للبنان ولا لغزة ولا أعتذروا لينا اه لينا(سبعة وستين)
رايح تعتذر علشان الكتب قلت ولم تفعل انك هتحرقها
أمال لو كنت حرقتها؟
طب لو كنت حرقت الصهاينة نفسهم
ودة حقنا ردا على لبنان وغزة
وهيحصل هتروحوا من ايدينا فين
الزمن طويل
ولو متنا ولادنا من بعدنا لحد ما ناخد بالتار
وربنا سبحانة وتعالى بيصبر قلوبنا وبيورينا ويوريكم أصلكم(الخنازير) بتندبح على ايدين خدامكم أنتوا بئا على ايدين أسيادكم أحنا
وأنا لمنتظرون

عليكم واحد

الدرس المستفاد واللي عاوز أوصلة ليكم
الدرس يا سادة وطبعا يا سيدات قبل السادة( ما هما اللي مخليين عيشتنا سادة) وبيشربوا علينا قهوة سادة أما نتكل وهن قاعدات يا خويا

لو كونت رأي في أي موضوع لا مانع أبدا بمجرد ثبوت خطأك ترجع في رأيك الاصح أنك لازم ترجع في رأيك الغلط بطلوا كبر
يا اخوانا الرجوع للحق فضيلة حتى لو على حساب نفسك

تخيلوا لو الحكام دماغهم لا مؤاخذة جزمة؟
وأنكروا الحقيقة الواضحة وأصروا على رأيهم الاول
هيبقى اية الحال؟

او الجمهور استمر في عنادة وما أداش الولية المهكعة دي حقها هيبقى اية الحال

بمنتهى الامانة والصراحة دة حالنا وعيوبنا واصلاحها في نفس الوقت
شايفين الصح وعارفينة كويس جدا وفي نفس الوقت بننكرة وبنقول لا ما نرجعش في كلامنا ابدا
لية يا عم الحاج
كدة ما بنغيرش
طيب أشرب بئا يا عم الحاج

النجاح من أعماق أعماق اعماق الفشل


Embedding disabled by request
http://www.youtube.com/watch?v=LzcMgn8OFtA

الولية دي زي ما أنتم شايفين حظها من الجمال تحت الصفر
وجسمها اللهم احفظنا شوال بطاطا
سنها بئا سبعة واربعين سنة كهنة يعني
من قرية في مجاهل أسكتلندا(توازي مجاهل الصعيد عندنا)
الولية دي دخلت مسابقة في الغنا مع مزز جامد جدا
رغم ان المحكمين سلخوها
والجمهور أتريق عليها

رغم كل ما سبق

واثقة في نفسها
مرحة


عايزين تقلدوا ؟
قلدوها
مش بناطيل واقعة يا عين أمكم والاندر ورور- أن وجد- باين
ولا البنات اللي لابسة من غير هدوم لا واية مغطيين شعرهم طب لية فهموهالي دي


قلدوا الكويس والوحش ما تقلدوهوش
والا هتبقوا زي القرود لو شافت راسها


اية فية حاجة


هيا راسها بلاش قلة ادب

كانت أتلمت وأتدارت

هوا كدة

أنتو زعلانين من عادل أمام لية
دة أوانة
ما تستغربوش أوي كدة
أيام الشيخ الشعراوي رحمة اللة علية طلع المشخصاتي عادل وخبط في الحلل مع فضيلة الشيخ محمد متولي الشعراوي!!!!!!!!!!!!!!!!!
فضيلة الشيخ لتفاهة شأن المشخصاتي تجاهلة تماما
واحد من مريدي الشيخ قال بمعرض ردة على كلام المشخصاتي ما معناة
دة اراجوز بنتفرج علية اما نحب نضحك مالة ومال فضيلة الشيخ
الخلاصة في زمن عادل امام توقعوا كل ما هو سئ

الى أن يرزقنا اللة بال امام العادل

مش عارف
يا اخوانا لحد أمتى هيفضلوا يكدبوا علينا
الكدب بيجيب نتيجة عكسية تماما
أما تقول حاجة تستدر بها عطف الناس
وتبان الحقيقة
بتكون النتيجة أن الناس بدل ما تعطف عليك تئرف من خلقتك زيادة ما هي قرفانة
ما تقول من الاول ان الواد وقع من على الحصان ومات
الناس بتكرهك طبيعي
لا هتزود ولا هتنقص حاجة
يمكن الناس اللي عندها في بيوتها حصنة (نسبة كبيرة من العربجية) تتعاطف معاك

أنما تقول مرض كامن وهوبا كلوبا يموت صاحبة
والناس على همومها تشيل همك
ويطلع مش هم دة فرط رفاهية يبقا النتيجة مع الكرة مزيد منة وفوق البيعة كثير من الاحتقار

منتظر اية غير كرة واحتقار مضاعف

أنتخابات عشرومية

أول مرة اروح أنتخب في نقابة المحامين في ثمانينات القرن الماضي
وانا داخل قاعة الانتخابات لفت نظري
مجموعة من الشباب بيهتفوا الأسلام هو الحل

طبعا الكلام دة لاقى في نفسي أستجابة فورية لأنة لو كان صحيحا لكان هو الحل
والعبد للة يفخر بأنة صلى خلف الشيخ ابراهيم عزت رحمة اللة( أستاذ الشيخ عمر عبد الكافي والغزالي وغيرهم من الشيوخ العظام) في مسجد أنس بن مالك في المهندسين
وصليت خلف الشيخ عمر عبد الكافي في مسجد أسد(بضم الألف وتسكين السين والدال) بن الفرات في الدقي وسمعت ووعيت الكثير من خطبهما اضافة للشيخ الشعراوي

المهم انتخبت قائمة الاخوان وقتها
النتيجة مقلب من النوع المفتخر
ولا طلعوا اخوان وأسلامهم يفصل فية اللة
وشعارهم فيما أرى أونطة في أونطة
وعيت الدرس كويس جدا
منا بغلط طبعا لكن نادرا ما أكرر الخطأ
اخر أنتخابات وانا داخل النقابة نفس المنظر الشباب والشعار
طبعا أفتكرت قلت مش ممكن أسكت
وخناقة من اللي قلبك يحبها بين العبد للة وبين الاخوان المتأسلمين(الاقرب للصواب)
في رأيي
بكرة أنتخابات نقابة المحامين
تفتكروا هنتخب مين؟
ما أعرفش
لان الاختيارات بين سئ وأسوأ
تبقا دي الديمقراطية اللي قارفينا بيها؟
الاختيار بين السئ والاكثر سوءا
تصدقوا نفسي أتسدت ومش عايز أكتب خلاص

مطرب العواصف

الحدق يفهم
واحد لابس احمر واخدين بالكو لابس أية ...احمر
بيفتح التلاجة (فيها جيلي مانجة من فوق ومن تحت عفن فازرق) واخدين بالكو من اللون أصفر في أزرق
الجيلي أتهز من فتح التلاجة قام اللي لابس أحمر قال لة ما تخافش أنا جاي أشرب مية بس

يوم الحد هيبان جاي يشرب مية ولا ناوي ياكل الجيلي



بيقول لك اية
الحكومة هتعمل اسبوع للتشغيل(ما تفهمش تشغيل اية)
كل محافظة أسبوع
هتشغل العواطلية
هيا الحداية بترمي كتاكيت
وبعدين هوا أسبوع واحد يكفي
وال اية هتبتدي من المنصورة
اشمعنى المنصورة؟
يمكن لارتفاع مستوى الجمال فيها
يعني الصعيد يولع بجاز لانعدام مستوى الجمال
حاجة تحرق الدم

انا شايف نحل مشكلة البطالة بالجهود الذاتية
كل شاب او شابة لا مؤاخذة يعبي شريط اي أغاني والسلام واحنا اصحابة هنشترية
أيون حاجة زي جمعية كدة وطبعا وكما جرى العرف اللي بيعمل الجمعية أول واحد يقبضها وطبعا مافيش داعي ااقول لكم صوتي رهيب أد اية
يعني مرة زمان وانا في بيت أبويا كنت بستحمى وخدتني الجلالة وأنا بغني في الحمام
واللة العظيم الجيران جت تخبط عالباب تشوف مين اللي بينازع دة مش ينقذوة ولا حاجة لا دول جايين يخلصوا علية من أزعاجة
بس طبعا دة لا يخلو من وجاهه اة واللة اما واحد بالشكل الفظيع دة يعمل شريط ويلم كام مليون (واخدين بالكوا) شوفوا انتوا بئا هتعملوا اية
طبعا وبما اني صاحب الفكرة هاخد من كل واحد منكو خمسة وعشرين في المية بلطجة
اية فية حاجة
وطبعا لو حد أو حداية
منكو لا قدر اللة اشتهر واتقتل أنا المحامي بتاع الورثة(ما كلها أعدام) والاتعاب معروفة مليون دولار أول درجة وتلاتة بس نقض
مش عارف مالكم مزمزئين لية؟
يعني هتكونوا اجدع من سوزان
ولا انا اجدع من الديب
ما بتحبوش الخير للناس لية؟
اة وتقدموا الشريط بتاعي غناء الاستاذ الدكتور المطرب علان الترتاني
اة ما دة وقت استخدام اللقب اللي عيني اتمئئت فية
وطبعا لو الشريط فشل(حلوة لو دي) تلموا من بعضكوا وتعملوهالي مفاجاة وتجيبوا الكام مليون
مش تستعبطوا وتقعدوا تواسوني والا واللة العظيم أغني لكم
ولقد أزعر من منظر
قصدي اعذر من انذر

الهوسا في الهلابوسا + تحديث هام جدا

تحديث هام
---------------
الحكم بأحالة اوراق طلعت مصطفي ومحسن السكري للمفتي(يعني أعدام) علشان قتلوا مطربة درجة عاشرة أسمها سوزان تميم!!!!!!!!!!!!!
والعبارة اللي اتقتل فيها 1209 بني ادم مكافح طافح الدم علشان زرقة ورزق عيالة ياخد براءة!!!!!!!!!!!!!!!!!!!!!
وقرايبهم الامن المركزي ضربهم وبهدلهم ومثل بيهم
مش الحرس الجمهوري شال النعش
ماحدش عزا اقارب ضحايا العبارة ولا بل ريقهم بكلمة ولا التلفزيون ذاع دقيقة قران على أرواحهم
ولا برنامج جاب شيخ يدي موعظة يصبر اهلهم على مصابهم الفادح
اللة هو العدل
قادر على حرق قلب الظالم مهما علا
وجبر خاطر المظلوم ولو كان مستضعفا
ودي مش النهاية
دي مجرد البداية
وانا لمنتظرون


أزيكم
عارف مكتئبين ومتنيلين بست ميت نيلة كل نيلة تنطح نيلة
هحاول ارفة عنكوا شوية مع ان الواحد لا مؤاخذة حالتة تصعب عالكافر
أصلي كنت مقدم على شغلانة حلوة كدة منادي على طيارة خط امبابة بوركينا فسو
اة مش بتلاقوا واحد مدلدل من الطيارة عمال يقول يلا امبابة امبابة
دي الشغلانة
واهو الواحد برضة كان ممكن يسوق الطيارة أما السواق يكون عامل كام دور ومحتاج ينام شوية( أصل المودان منكدة على امة)
أو لا مؤاخذة واحدة مضيفة تتخبط في نا فوخها وتقايس وترمي نفسها في التهلكة( أنا التهلكة)
أنما بئا ما فيش نصيب
بمناسبة امبابة
فية حكاية كدة من ايام ما بعد الجامعة( واخدين بالكوا من الاخضر بريحكوا نفساويا)
كان فية واحد جارنا راح امريكا من واحنا في أول الاعدادي ورجع بعد الجامعة وعامل فيها بئا الواد الامريكاوي الجامد أوي واحنا طبعا شمحطجية وصايعين الواد دة وكنا بندلعة بزومي كان لينا معاة مغامرات تشيب الكتكوت
في مرة من ذات المرات
جة يسالنا اية أمبابة دي؟
لية يا زومي
أصلي بلائي الميكروباص يجي يقول أمبابة الناس تجري علية وهتموت نفسها علشان تركبة
مش بقول لكوا امريكاوي
طبعا وقع في ايدين من لا يرحم ولا يسيب رحمة ربنا تنزل
قعدنا نحكيلة وعلى مدى شهور طويلة عن مدينة أمبابة الترفيهية وازاي تضرب ديزني لاند على عين اللي جابوها والالعاب الترفيهية اللي مالهاش مثيل في الدنيا والمناظر الساحرة وشلالات المية والتزحلق على الجليد وطبعا احم اكيد يعني احم احم المزز
اللي تحل من عالمشنقة
وهكذا لحد ما الشاب استوى
وفي يوم من ايام الصيف القائظ ( ان ان ااااااااان) موسيقى تصويرية
خدناة في عربية سيات معفنة وقعدناة ورا ولا هوا ولا باب ولا اي حاجة امعانا في التعذيب وعلى أمبابة
الواد يا ولداة ما نطئش
لففناة كل الحواري والازقة ووريناة بحيرات المجاري الساحرة والتزحلق في الطين أما عن المزز فخد مئلب عمرة وشاف جبال الزبالة المهم
ادي الجمل وادي الجمال ولمدة ساعات متواصلة لم نترك اي تفصيلة منيلة بنيلة الا ووريناهالة
طبعا الواد جت لة صدمة نفساوية
وفضل قاعد في بيتهم لاسابيع الى ان فاق من الصدمة
اي حد لة شوق في تور في أمبابة أي خدمة
اتكلموا على تليفون صفيرصفرين تلت صفافير يجي لكم مندوبنا فورا

برنجان و برارس

الجو النهاردة عظمة
اية مش مصدقيني؟

طب اشمعنا بئا

مصدقين الخبر بتاع البت هيفا ام فرح بتسعة مليون دولار بتقول اية بئا
واللة الواحد مكسوف برضة مش مصدقين اني مكسوف طب روحو موقع البشاير وشوفوا بتقول اية مع عدم اللامؤاخذة هيا مش عندها بنت وشابة بتاع تسعتاشر سنة كدة ولا اية طب وماليكو عليا حلفان قالت ان ليلة الدخلة تعبت شوية اصلها لا مؤاخذة كانت بنت!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
يا خرابيييييييييييييييي
تصدقوها وتكدبوني
ماشي يا بشر

الواد الوزير اللي طالع يغيظ الشعب ويقول ان فية انفلوانزا جاية في الخضار ومش فاكر اية كمان
الواحد مش عارف ياكل اية اللحمة فيها حمى قلاعية وطبعا مخلوطة بالخنازير وعيش يا عم الحاج
الطيور أنفلوانزا
السمك بيجيب سرطان
ماشي نمشيها نباتي
وملعون أبو القولون اللي هينفجر
يطلع ابن الصرمة يقفلها
ماشي مصدقينة ومكدبيني برضة

أحب اهنئ الاخوة المصريين لان ولأاول مرة منذ حرب تلاتة وسبعين نسمع عن الجيش المصري هوا اي نعم مش سمع خير لكن اهو سمع والسلام حاجة تفكرنا ان عندنا لا مؤاخذة جيش
بيقول لك اية يا عم الحجز(مش غلط أملائي)لان فية قانون يمنع المصريين من التحدث عن الجيش اة وعهد اللةواسألوا عصمت السادات
ال اية مخازن الجيش الرئيسية في أبو سلطان انفجرت
دة حتى السلاح يا مسلمين كفر من كتر تخزينة راح مفرقع
يا دين النبي
الشعب هينفجر أمتى ؟
أما تعرفوا قولوا لى عشان أفضي نفسي

كفاية كدة ولا عايزين تاني
طب خدوا عالماشي كدة
الاهلي بيتمرن من غير جوزية
وموني راحت تمتحن كيمياء وما خلتش خالتها ستيتة تذاكر لها(دة مش خبر دي زومبة ) من النوع المفتخر بس ما تعرفش لمين لستيتة اللي لا حول اللة ملخومة لشوشتها في الاستمحانات ومش ناقصةولا لموني اللي ان شاء اللة هتنجح بالعند فيكو
وبعدين بيقول اية بئا وركزوا معايا في الخبر دة لان واحد أو واحدة بس اللي هيفهمة
المطارات واخد بالك يا عم الحاج المطارات عاملة اضراب والطيارات بئا وسواقينها والمضيفات عاوزين تورتة لا مؤاخذة

الحر سيح نافوخي اي حد نازل يجيب لي معاة سنكوتشين برارس وبرنجان لحد ما الانفلوانزا تحل عن سما اللي جابونا
فزورة عالماشي كدة
بيقول لك اية الشاطرة تغزل برجل حمار
حدد :
أولا من هي الشاطرة
ثانيا من هو الحمار(اهو انت)
ثالثا اجباري
هتفصل الرجل عن الباقي ازااااااااي

نظرية الحمار والبردعة

فية حملة ضد الفساد
يقودها أفاضل محترمين ومحترمات من ذوي المدونات
دة شئ لطيف وظريف ودمة خفيف

لكن وبما اني الشريك المخالف
احب انبة لحاجة من وجهة نظري مهمة

حضراتكو سايبين المرض وماسكين في العرض
سألتوني ازاي
احسن
هعتبر انكوا سألتوني

دلوقت الحكومة(الاصح العصابة) بتطلع بيانات بتقول ان الاجور والمرتبات مش عارف كام مليار(لم أتوقف طويلا لثقتي انها بيانات كاذبة)
حلو
لا مش حلو
اولا البيانات دي تشتمل على الاتي


1-أجور ومكافات الاف المستشارين (بدون أي عمل)والتي تبتلع الجزء الاكبر من هذة المبالغ وبدون اي وجة حق وبدون اي حاجة فعلية لهؤلاء المستشارين


2-مصاريف مكتب كبار المسؤلين من وزراء ووكلاء وزارات ومديرو عموم بما فيها الديكورات والتكييفات ومصارف نثرية ما انزل اللة بها من سلطان ودليلي خلوهم يدفعوها من جيوبهم وأؤكد انها ستصبح صفر


3-مكافات فوق المرتب للموظفين التابعين لمن سبق ذكرهم والمتكفلين بأحالة حياة صغار الموظفين الى جحيم مقيم بلا اي ذنب الا ابعاد الانظار عما يجري من عمليات سلب لصالح الكبار (ماهو لازم ينوبهم من الحب جانب)


4-يشتمل هذا البيان طبعا على مرتبات أعضاء مجلسي الشعب والشوري ومكافاتهم وبدلاتهم من سفر داخل وخارج مصر ومصاريف رئيسي المجلسين ومكاتبهما وتشريفاتهما


5- طبعا يشتمل على مرتب ومصاريف مكتب رئيس الوزراء ومرتبة و....و.....عاوز أشتم بس أعمل اية بحترمكم



6- يشمل مرتب رئيس الجمهورية و.... نفس الكلام اللي فات


7- يشمل مرتبات الجيش والشرطة والعربيات وال ....... يا ولاد ال.......
برضة همسك نفسي


بعملية حسابية بسيطة جدا اخصم دة من دة يبان لك الاجر الحقيقي للموظفين
واذا دة حصل
هيبان مين الحمار ومين البردعة


يا حضرات الافاضل المحترمين بلاش نبقا زي الطوبجي الاعمى
الموظف لا حول لة ولا قوة ومظلوم بالظبط زي اي مواطن طلم بين وفج وقمئ


بالبناء على كل ما تقدم
أطالب بتعديل الحملة على الموظفين الغلابة( وللة الحمد لست منهم)
واعادة توجية الحملة للمتسبب الحقيقي فيها


كلام جد اهه ولا فية تهرج ولا ضحك
أصل بصراحة الموضوع لا يحتمل لانة ينطبق علية الهم اللي يبكي
حاول تعيش بخمسميت جنية في الشهر

حاول

هل رأى الحب شوكارة

اية اللي يفرق الحب عن الجواز؟
المعيلة عن الرجولة أو الانوثة؟
الروقان عن الهم الازلي؟
الحزن الوطني عن المصريين؟
الفرق حاجة واحدة
المسؤلية
بتحبو كويس
وبعدين
بتشوفو بعض قد اية
ساعة
ساعتين
خمسة
وبعدين
كل واحد على بيتة
يا أما اكلي يابا أصرف صح
انما الجواز
في خلقة بعض طول النهار والليل
ومتطلبات يا عم الحاج أو الحاجة
هي عايزة طلبات البيت
وهو عايز يطفح(طبيعي)ماهو الاكل مش هيجي ويطبخ لوحدة
عم الكتكوت مش عايز لا ينزل ولا يدفع؟
والكتكوتة مش عايزة تتطبخ؟ او ما بتعرفش
وبعدين الحب يقلب لحرب عالمية
الحل بسيط كل واحد يتحمل مسؤليتة
ما تعرفوش ان فية مسؤلية
طب اديني بقول لكوا اهه
اساس الدنيا (الكبد) المنصوص علية في القران هو المسؤلية
ولقد خلقنا الانسان في كبد
المعاناة والمسؤلية علشان كدة من اهم أوصاف الجنة لا كبد الحاجة تخطرعلى بال الابعد تتحقق فورا
انما بما ان لسة شوية عالجنة
فأنتوا في كبد(بفتح الكاف والباء وتسكين الدال)
مش عاجبكوا ما تحبوش وما تتجوزوش
وبرضة هيطلع عينكوا لانك شايل مسؤلية نفسك
التلميذ ولا التلميذة شايل مسؤلية مذاكرتة ونجاحة يعني في كبد برضة
بعد شوية بتشليوا مسؤلية واحد كمان الزوج او الزوجة وبعدين ربنا يبتليكو(مش بمصيبة) بطفل ولا أكتر المسؤلية زادت اكتر واكتر السؤال دلوقت
هل اعددت نفسك لهذة المسؤلية؟
يا ننوس او ننوسة عين أم اللي جابت(تاني) بلاش الطيب أحسن
ما أعددتش
غور في داهية لان النتيجة المؤكدة الفشل
مافيش حاجة حلوة على طول ولا حاجة وحشة على طول انما انت او انتي اللي بتخلوا الاشياء حلوة ووحشة بطريقة تقبلك لها وتعاملك معها

اما عن الفرق بين الحزن الوطني والمصريين لا يخرج عن هذا االسياق الحزن مش عاوز يتحمل المسؤلية لكن اول من يلهط نتاج عرق المصريين

حدد طريقك او حددي طريقك
هل انت ولا انتي مصريين ولا تبع الحزن الوطني؟

بمناسبة الامتحانات

ملاحظ ان المدونين والمدونات داخلين على معمعة الامتحانات
وحالتهم المعدنية في الحديد(المعنوية في الحضيض)
وعمالين يخلعوا من التدوين ورا بعض(هيا المدونات فيها أنفلوانزا خنازير وعاملينها مفاجاة ولا اية)
بناء علية قررنا نحن هانئ اني اديكم نصايح تاخد بأيدكم للنجاح بس
أولا: نام وأرتاح يأتيك النجاح
ثانيا:من سهر الليالي(بعيدا عن المدونة) بات للعام التالي
وبعدين لا تنسوا نصيحة المربية الفاضلة عبلة كامل(أم اللمبي) مذاكرتك في دماغك مطوتك في جيبك واللي يقول لك غششني شرحة( الخمسة جنية بتاعة البيرة عليا)
ملحوظة هامة:-
--------------
اتباع النصائح السابقة طريقة مؤكدة للسقوط أوعوا تسمعوها
بس في نفس ذات الوقت ما فيش داعي تحرقوا قلبنا عليكوا وتفلسعوا خير الامور الوسط
خدوا أجازة وتعالوا
وأما تنجحوا(أدخلوا عند دودو) وعاوز بوفية تلك الاصل وانا اتعزم لوحدي ,اي حد هيقرب لتورتة الشيكولاتة (واخد بالك يا باشمهندز) هورية وما تنساش انك مدرس ما تفرقش ثانوي من جامعة ودة تهديد ووعيد والعبد للة سوابق
أو ممكن حقنا للدماء(دمائي أنا طبعا) تجيبوا تسع تورت شيكولاتة ونقسمها بالعدل انا تمانية ونص وانتي الباقي
اية فية حاجة ما هو دة الفكر الجديد أعترضوا بئا
يارب تنجحوا كلكوا
وتتنيلوا قصدي تتجوزوا واللي متجوز يتجوز تاني وتالت ورابع لا يا فالح الرجالة بس
وتجيبوا ولاد وبنات
واللي عندة يزودهم الضعف أو اكتر
أمين امين امين
وبهذة المناسبة المنيلة(الامتحانات يعني)
لية أطلقوا على البنات الجنس اللطيف؟
طبعا لانهم بيجيبوا للرجالة لطف

من غير عنوان

زمان أما كنت تلموذ في ثانوي
كان مكتوب على جدران كلية الفنون الجميلة
لعن اللة أمة ضاع العدل فيها
أيام ثانوي الجميلة أيام الا مسؤلية
كنت في تالتة سابع رياضة
وكان فية وكيل مدرسة بيتكيف أوي أما يطلع طابور الصبح ويقول مقولتة الخالدة
قررت المدرسة فصل الطالب ويعدد الاسماء
ويجي لحد فصلنا ويتكيف عالاخر ويقول
وقد قررت المدرسة أغلاق فصل تالتة سابع رياضة لحين حضور اولياء امورهم
ساعتها الواحد كان يفتكر الشعار اللي كان على سور كلية الفنون الجميلة
أية الظلم دة
يرفدونا لية
يمكن علشان ما كناش بنحضر خالص واية يعني وهيا جديدة الحكاية دي ما طول عمرنا بلاد اللة خلق اللة الا الفصل ما نعرفوش الا اسما بس

طب يمكن علشان اما حبسونا جوا المدرسة أجرنا عربية نقل مخصوص علشان ترجع بضهرها في السور تكسرة نقوم نخرج براحتنا

ولا علشان الناظر عمل حملة على القهوة اللي بنقعد عليها وأفش تلت تربع الفصل( أحنا في الزوغان يا باشا) وعملوا بأصلهم وأروا علينا

ولا علشان مدارس البنات اللي في المنطقة لسانها اتدلل من الشكوى مننا لاننا مصاحبين البنات عندهم وطول النهار عمالين نعاكس فيهم( برضاهم) مش بلطجة ولا تحرش

ولا علشان مدارس الولاد اللي حوالينا تتعرض يوميا لغزوات شلتنا والنتيجة طبعا جرحي واصابات شديدة عندهم وأحنا ولا اي حاجة( يمكن كام غرزة ولا كسر دراع ولا رجل)حاجات بسيطة لا تذكر يعني

ولا يمكن علشان أما نكون مفلسين وما فيش حتة نروحها نصطاد المدرسين بتوعنا ونكسر عربياتهم أو نخبي الكاوتش بتاعاها واما يزهقوا من عمايلنا يدونا فلوس علشان نحل عنهم


كنا تلامذة نجباء وشطار ومطيعين ومؤدبين
لية يرفدونا؟
اية الظلم دة

هل مفاهيمنا محتاجة نص نعل؟

عالعادة نخش في الموضوع
المفروض ان الانسان يكون عندة مقياس للأشياء يقيس علية الصواب من الخطأ
مش كدة؟
طيب هل عندنا المقياس دة؟
جاوبوا بعد ما تقروا
النظام الحاكم بيدي الموظف تلتميت ربعميت جنية يعيش بيهم
ينفع
الموظف بيدور على مصادر أخرى للدخل
شغل تاني مافيش(هوا كان فية أولاني)تصدقوا باللة واحد زميلي من ثانوي سنة من سني لحد النهاردة ما أشتغلش ما كسبش جنية واحد معاة بكالوريوس تجارة ما تتعبوش نفسكوا وتدوروا لة على شغل الشاب اتلحس اة واللة
نرجع مرجوعنا الموظف يعمل اية
طبعا بيقلب نفسة ويرتشي(اذا كان لفظ الرشوة صح) سيدنا عمر جالة راجل عجوز بيشتكي من عقوق ابنة سيدنا عمر طبعا قال هاتولي الواد دة من قفاة(ما قالش كدة بالظبط) جابولة الواد سألة اية ياض اللي نيلتة دة قال الواد اية حقوق الابن عند ابوة(تصدقوا فية حقوق للابن عند أبوة ومن الف وربعميت سنة) رد عمر
يحسن اختيار امة
يحسن تسميتة
ان يزوجة
الواد رد
امي عبدة سودا
سماني جعران
ولا جوزني ولا حاجة
سيدكو عمر قال للاب اية
اذهب لقد عققت ابنك قبل ان يعقك
فهمتو
أحنا عمالين نشتم في الموظف واللي خلفوة واللي حطوا بذرة اللي جابوة وما سألناش نفسنا سؤال بديهي يعيش ازاي؟وحقة اية علشان ناخد منة حقنا ومين المسؤل
ولية بنرمي التهم على الناس كدة مع ان عمر رمز الشدة في الاسلام(واللي ضفرة برقبتنا كلنا)سأل الاول على الحقوق قبل ما يسأل عن الواجبات
دي واحدة
التانية في نفس الموضوع و للصدفة البحتة برضة من يردنا فيها الي الصواب هو عمر بن الخطاب
حصل جدب(النيل بطل يفيض)ومصر بلد زراعية مابقاش فية رزرع وحصلت مجاعة في مصر على عهدة!!!!!!!!!!!!!!!!!!!
بعت لة من يحكم مصر ياخد رأية ويسألة يتصرف ازاي
فرد علية حتة رد
طهر جندك من الفساد يأتيك النيل بالقياد
بس كدة سبع كلمات بالعدد
وأوقف العمل بحدود الاسلام الماليةلحين انتهاء الجدب

مش بقول لكوا مفاهيمنا محتاجة نص نعل في احسن الاحوال وفي اسوأها نرجع لمفاهيم ديننا(الصحيح)والصحيح دي بئا عايزة مجلد

موني دبستني

من أنت ؟ وما الذى تفعله هنا ؟

انت اللي مين ياض
بعمل زي الناس



إسرائيل تقصف كل جنوب ممكن بحثا عنك ، أى شمال ستقصد؟ .

قصدك أهرب؟
دنا مستني من خمسة واربعين سنة
هاجي دلوقت واهرب
لا يا عم الحاج
هأرأش عظامهم بسناني



أنت مكلف بحذف حرف من حروف اللغة العربية .. أيها ستختار ولماذا ؟
وأشمعنى انا لو مش عاجبك حرف ما تحذفة
انما انا عاجبني كدة



لو قدر لك أن تدخل السجن فما هي القضية التي تتمنى ان تدخل بها إليه؟

التخطيط والتامر لمساعدة الفلسطينيين


بالمناسبة.. منذ متى اكتشفت نفسك؟

بالمناسبة لسة ما اكتشفتهاش
أكتشفتها مرة ما عجبيش ما اكتشفتة ردمت عليها تاني



على مفترق طريق لافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

الاتنين واحد يا فالح
حلمي هو بالظبط ما لم يحلم بة بشر



نحن لا نعيش حياتنا بل نتعلم فيها كيف نعيش ما تعليقك؟

فذلكة لغوية
اذا كنا لا نعيش حياتنا مين اللي بيعيشها؟
بنعيش ونتعلم يا عم الحاج



بجملة واحدة فقط أكتب تعريفاً لكل كلمة من الكلمات التالية:
الوطن

بلدي

الأم

اللة يرحمها

الليل

الهدووووووووووووووووووووووووووووووووء

الحب

مالة

أمريكا

مزة عاملة شريفة

المرأة

حبيبتي

الصمت

من ذهب

الانترنت
حلو ولا وحش؟



أخترمنصباً واتخذ قرارا ؟

لا يا عم شكرا
مش عاوز




قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟
لو تكلمن هيغير الشعراء رأيهم وبدل الشعر هيجروا وراهم ويحدفوهن بالطوب



أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل
لا طبعا
بلاش قلة أدب أصل السجن مش حلو بتحصل فية حركات مش تمام


إلى أين تمضي كلمات الحب .. بعد أن نقولها؟

نفس المكان اللي راحت فية الشيكولاتة بتاعة صلاح جاهين
الشيكولاتة ساحت راحت مطرح ما راحت



هل تجد علاقة بشكل أو بآخر بين المرأة وقطاع الطرق ؟
لا طبعا لان قطاعين الطرق يا بيتوبوا يا بيتمسكوا
المرأة بئا يا عم الحاج عمرها ما هتوب ولا هتتمسك أحتمال تتجوز والزواج تهذيب وتأديب وأصلاح



هذا فراق بيني وبينك .. متى ولمن تقولها ؟

┐شلاضيمو من تمانية وعشرين سنة بئولها وبرضة كابس على مراوحي تلامة



كيف هو غداً ؟

يا مسهل



امرر التاج الى
اللي عايز يشيل يشيل أصلي ما بحبش أجبر حد على حاجة
لكن ممكن أقترح اضافة لمن أقترحتهم موني
عروسة البحر المختفية
كوكيتا
القدر وأنا
ريم
عاشقة الرومانسية
سهير زكي
و شلاضيمو براحتي فية حاجة

بكلويز يا بكلويز يا راعي الغنم والمعيز

الشعب المصري دة شعب محترم جدا
حرم رئيس الوزراء توفت
الموقع اللي ناشر الخبر فية تعليقات
كل التعليقات تعزية فقط
وأكثرها تطرفا تنادي باخذ العظة من الموت

بعد كل اللي الناس شايفاة بمنتهى الادب والاحترام تعزي من يظلمها
بالذمة فية ناس محترمة أكتر من كدة؟
شعب محترم جدا
ومسؤلين على النقيض تماما

نيجي بئا لمربط الحمار
النهاردة عقبال أملتكوا جميعا واذ فجاة ببص في رخصة العربية لقيتها خلصت مش بس كدة لا وشهر المهلة كمان دة اخر يوم فية
ايوة(وربك عالم باللي في بالي)
قلت مش مشكلة ساعة ولا اتنين اجدد الرخصة واشوف شغلي
رحت المرور الساعة تمانية ونص
اة فتكم في الكلام
أنا لسة شاري العربية من سنة ودفعت ترخيص تلت سنين لكن علشان العربية مستوردة ادوني تصريح سنة واحدة لحد ما تستكمل الاوراق وبعدين نكمل المدة
أول احتكاك ان ان اااااااان
روح هات المخالفات من المرور المركزي في الدراسة
لية يا جن؟
أصل كان فية أزمة في النمر وكنا بنجيب النمر مركزي ومالناش دعوة بيها
طب وأنا مالي يا غزالي(الولية نسخة تلك الاصل من الحلوف) أحنا اللي مالنا
طبعا العرق الصعيدي راح فاطط وقدام مكتب رئيس الوحدة ورحت مديهم من أول الموجودين واللي مش موجودين من المسؤلين لحد اجدادهم من عصر ما قبل الاسرات
ان حد يحس ولا يرد
صمت
خدت بعضي ورحت
جبت الشهادة وبالعند فيكو ما فيش مخالفات يسيبوني لا ال اية ادفع ستاشر جنية ونص
بتوع اية ماحدش يعرف ماشي يا ولاد (تربتييييييت)
وانا طالع من مكان الانتظار(ركزوا شوية) الموقف دة بتاع أيتام الساعة بتلاتة جنية لو عاوز تدفع اكتر ماشي؟
اية مين فين لية
مال الايتام وموقف عربيات قدام مرور الدراسة؟
كل اللي فية عساكر
والمنادي شكلة بالراحة كدة وبدون مبالغة قتال قتلا
وبعدين يسالوا الناس الرحيمة راحت فين؟
العيب مش في الناس
العيب في النصابين اللي بيشوهوا كل ما هو جميل ويتاجروا بية
المهم رجعت المرور ومعايا الشهادة كلة في التمام يا ولاد ال....
قالوا لي لا هات لنا من شركة التأمين ما يفيد انك دافع
يعني اية؟
هوا كدة
وانا اية عرفني انا امنت في انهي شركة
بسيطة روح الارشيف وطلع ملف العربية وصور التأمين وروح الشركة تديك ملحق تامين !!!!!!!!!!!
-يعني عندكوا الاصل؟
-طبعا
-وعاوزين صورة
-اة الشروط كدة
-يا ولاد المتخلفة
رحت وطلعت الملف وصورت الوثيقة ورحت للشركة ما لقيتهاش
اة واللة
-راحت في انهي داهية الشركة الموكوسة
-مشيناها اصلها وحشة
-طب والحل
-روح المركز الرئيسي في الميريلاند وهات الملحق
-هههههههههههههههههههههههههههه
-ايووووووووووووة
-شوفوا حل تاني
-ادفع التامين لاي شركة تانية
-هههههههههههههههههههههههههههه
-المبلغ 350جنية بسيطة أدفعهم تاني
دفعت ما هو مدفوع لية لان فية راجل في النيابة المفروض أروح لة اطلعة وكل شوية يكلمني ألحقني يا استاذ والاستاذ متاخد رهينة عند الحكومة
المهم ما أطولش عليكو لتناموا مني قولوا لا طول
سلمت الاوراق وراحت الكمبيوتر اة اصل حكومتنا الكترونية تواكب العصر(عصر المواطن)
فات ربع ساعة نص ساعة ساعة ساعة ونص ساعتين
يا ولاد ال......... فية اية واحد واقف معايا بيقول لي أنا ظابط انتا هتروح تنام وأنا رايح عندي خدمة (وردية شغل) اتناشر ساعة ومنتظرين منة عدل وعقل وتصرف بأنسانية!!!!!!!!!!!!!!
أصل الكمبيوتر مش مجهز علشان يدخل حروف وارقام النمر الجديدة فبيطلع كل رخصة في تقريبا عشرين دقيقة والمفروض ما تاخدش نص دقيقة
ههههههههههههههههههههههههههههههههههههه
وبعد ما يخلصوا الكمبيوتر يبتدوا يعيدوا نفس الشغل تاني بس يدوي لية يا بقر يعني لو رحنا في داهية حد هينفعنا اصل الحكومة نسيت تعدل القوانين ولا زال المعترف بية العمل اليدوي أما الكمبيوتر والحاجات دي علشان يفرحوا الواد ريس الحكومة ويطلع في التلفزيون يتفشخر وبس
أخدت الرخصة الساعة اربعة الا عشرة عصرا وركبت النمر الجديدة في ربع ساعة روحت كانت الساعة بقت ستة
حروف النمرة الجديدة
(سرج )حمار ولا حصان ولا بغل ما تعرفوش
الواد اللي بيركب النمر بيحلف ان كان من كام يوم الحروف
عين وراء وصاد
هههههههههههههههههههههههههههههههههههههه
هيا الحكومة حاطة أوصافها في الحروف ولا اية؟
نسيت اقول لكم ان كان معايا واسطة علشان كدة الامور كانت سهلة جدا!!!!!!
واحد صاحبي بيحلف لي انة بقالةاربع ايام من تمتنية الصبح لاربعة العصر ولسة ما اخدش الرخصة وبيسألني والنبي تيجي تخلصهالي أما عرف اني خلصتها في يوم واحد بس

خالص تحياتي
للحكومة الالكترونية والفكر الجديد والعولمة والخصخصة

الكو كميل

من أمبارح تحسوا أن فية حاجة غريبة شويتين الجو منيل بستميت نيلة حر نااااار لأ وراح قالب بتراب كمان يعني حر نار وتراب لا واية ستيتة مختفية خالص تقولوش ناقصة وقبلها الأهلي أتوكس
ومراتي عندها ألفنوانزا(يا مسهل) وعدت الواد وعندة أمتحانات وطبعا الواد هيعدي اختة وأنا طبعا في وش المدفع
هوا فية أية ؟
اية المصايب اللي ورا بعضها دي
دة على المستوى الاسري
وعلى مستوى الاصدقاء
ستيتة زي ما قلت لكم
وموني عندها استنكئاب نفساوي والقدر وأنا كاتبة حتة دين بكائية تقطع القلب
أما على المستوى العالمي زي ما أنتم راسيين وبا وأزمة أقتصادية وحاجة غم على الاخر
طب و اية سبب البلااوي دي كلها؟

كوكيتا جاوبت على السؤال دة

النهاردة عيد ميلاد بسلامتة
يا دي اليوم الأغبر ماكنتش أمة قعدت علية وبططتة وريحتنا
يلا ربنا يجعلة أخر الاعياد يييييية قصدي الاحزان يييييييييية أفهموا اللي تفهموة

تساؤلات

الدنيا مقلوبة على النظام المصري علشان بيدبح الخنازير وكل شوية حد يروح فائعنا تصريح وصلت لحد الشتيمة(يستاهلوا طبعا) لكن السؤال
لية دة ما حصلش مع معتقلي الفكر لية ما حدش عمل واحد على ألف من دة
الانكى ماحدش نطء على ما حدث للفلسطينيين في غزة(مازلت مصرا على عدم تقسيم فلسطين ما بين ضفة وغزة)
أعتقد ان الخواجات دول والخنازير قرايب قرابة( كلمة زي السم)وهي عكس طهارة

مصر بئا مقلوبة على حاجة تانية خالص
فريق الاهلي
كل ذنب الفريق ان بعد اربع سنين فحت وردم وبطولات بالزوفة الولاد تعبت ودة حقهم الطبيعي تعبوا فيها حاجة دي محتاجين راحة أجرموا
كل واحد الاهلي عقدة في عيشتة وبقالة اربع سنين مربي لة الهسس لقاها فرصة بئا يقطع في الفريق
يا اخوانا اللي حصل دة عادي جدا
اللي مش عادي ويستاهل المحاسبة بجد استغلال اللعيبة بشكل غير ادمي اربع سنين
ما بين دوري وكاس مصروافريقيا أندية وكاس عالم للاندية ومنتخب قومي( يسرق مجهود اللعيبة والنادي والمدرب) وينسبها لاتحاد كورة مرتشي ومدرب كبيرة معلم على قهوة بلدي
فين حق اللعيبة دي في الراحة؟
فين
طبعا ما فيش
خلاص يبقى مش من حقنا نطلب منهم أي حاجة
الاصول كدة
تاخد وتدي
ما أديتش ما تاخدش
بالبساطة دي

بناء على طلب الجمنهور

اسمك....؟

هانئ

المشهور بيه وسط اصحابك..؟

فية تلت مستحيلات الغول والعنقاء والخل الوفي(الاصحاب يعني)

سنك...؟

سبعتاشر سنة وخمسميت ستميت شهر

مجال دراستك
قانون أو حقوق(عمركم سمعتوا عنها) ولا أنا

اسم مدونتك ..؟

مصري جدا

الصوره الرمزيه لمدونتك بتعبر عن ايه ...؟

مصانع بلدنا
ولشلاضيمو الحمد لا عاد فية مصانع ولا فية بلدنا

هل فكرت في اغلاق المدونه ؟ والسبب ..؟

يعني مش كتير كل يوم سبع تمن تلت مرات كدة

ايه رد فعلك لو حد قل ادبه عليك في تعليق ...
هديلة على دماغة